«Қазақстандық мұнай-газ кешенінің салалық кәсіптік одағы» қоғамдық бірлестігінің төрағасы Сұлтан Қалиев, Қызылорда облысы аумақтық кәсіподақтар бірлестігі төрағасы Серік Сермағамбетов бастаған кәсіподақ көшбасшылары кәсіпорындарда болып, саладағы кәсіподақ белсенділерін Кәсіподақтар күнімен құттықтады. Құттықтау «СНПС – АйДан Мұнай» акционерлік қоғамында бастау алды, компания басшылығы мен кәсіподақ ұйымдары белсенділері қатысқан кездесуде С.Қалиев мұнай саласындағы еңбек нарығы мен кәсіподақтардың саладағы рөлі және әлеуметтік әріптестік мәселесі тұрғысына сөз қозғап, кәсіподақ ұйымдарының ұжымдық шарт жасасу кезеңіндегі келіссөздер тәртібіне сәттілік тіледі.
«Петро Казахстан Құмкөл Ресорсиз» акционерлік қоғамында компания басшылығы мен кәсіподақ ұйымы ардагерлері, белсенділері жиналды. Кездесу барысында биылғы жылы алғаш рет ресми түрде Үкімет қаулысымен бекітіліп 10 Қазанда аталып өтіп жатқан кәсіподақтар күнімен Компанияның кәсіподақ ұйымы құрылғанына 30 жыл толған мерейтойының тұспа-тұс келуі аталып өтті. Көп жылдар бойы өңірдегі ірі мұнай компаниясының кәсіподақ ұйымының көшін бастаған ардагер кәсіподақтарға, әлеуметтік әріптестіктің үлгілі көшін көрсеткен компания басшылығы өкілдеріне, бірқатар кәсіподақ белсенділеріне Қазақстандық мұнай саласының 120 жылдық мерекелік медалі, «Қазақстандық мұнай-газ кешенінің салалық кәсіптік одағы» қоғамдық бірлестігінің, Қызылорда облысы аумақтық кәсіподақтар бірлесігінің марапаттары табысталды.