«Келешек» Жастар кеңесінің жобасы «Profbookclub-Karaganda» кітапқұмарлар клубының кезекті отырысы аясында «Ағылшынша тіл сындыру» кітабының авторы Ернат Мелсұлымен кездесу өтті.
Қарағанды мемлекеттік техникалық университетінің Серпіндестер ордасына 100-ге жуық студенттер – жатақхана тұрғындары, «Келешек» Жастар кеңесінің, «Жас Орда» Жастар Қауымдастығының мүшелері жиналды.
Қарағанды облысы Кәсіподақтар Орталығының «Келешек» Жастар кеңесінің төрағасы Дария Хамитжанова кездесу мақсатымен, автордың еңбегімен таныстырды.
«Ағылшынша тіл сындыру» кітабы – қазақ тілі арқылы ағылшын тілін тұңғыш өз бетімен үйрену құралы, автордың 20 жылға жуық тәжірибесінің және тікелей осы кітапты жазуға жұмсаған 3 жылдан астам уақыт ізденісінің нәтижесі. Ернат Мелсұлы еңбек жолын Ақтоғай ауданында қарапайым ағылшын тілі мұғалімінен бастаған, республикалық деңгейде ағылшын тілінен тікелей қазақ тіліне кәсіби аудармашы, ұлттық және халықаралық телеарналарда іс-тәжірибеден өткен өз ісінің жетік маманы, Орталық Азиядағы тұңғыш ULYS цифрлық журналының тұрақты сарапшысы және салауатты өмір салтын насихаттаушы.
Кездесу барысында автор «ENGLISH+MOTIVATION» презентациясынан кейін қатысушылардың сұрақтарына жауап беріп, ең белсенді қатысушы Гүлсім Әуелбековаға кітабын сыйлады.