Ақтөбелік бастауыш кәсіподақ ұйымының мүшелері тоғызқұмалақ және шахматтан өткен республикалық турнирден олжалы оралды.
Байрақты бәсеке Қазақстандық салалық білім және ғылым қызметкерлері кәсіподағының ұйымдастыруымен елордамыз Нұр-Сұлтан қаласында өтті. Оған турнирдің облыстық кезеңінде жеңіске жеткен 65-ке жуық білім қызметкері қатысып, бақ сынасты.
Облыс ұстаздары ой ұшқырлығын көрсетіп, жеңіс тұғырынан көріне білді. Тоғызқұмалақтан ерлер арасында Қ. Жұбанов атындағы Ақтөбе өңірлік университетінің оқытушысы Азамат Қайдаров I орынға ие болса, әйелдер арасынан Мұғалжар ауданы, №1 Ембі орта мектебінің мұғалімі Гүлзат Бақтарбаева қарсыластарын шаң қаптырып, үздіктердің көшін бастады.