Т.Күзембаев атындағы шахтада кеншілермен кездескеннен кейін Қазақстан Республикасы Кәсіподақтар федерациясының төрағасы Сатыбалды Дәулеталин Қарағанды облысы Абай қаласындағы «Абай» кенішіндегі кеншілерді еске алу мемориалдық кешеніне гүл шоқтарын қойды.
Мемориалдық кешен ең ірі апаттың жылдығына, 2008 жылы шахтада тірідей өртенген кеншілерді еске алу үшін тұрғызылған. Ол кезде 30 адам қаза тауып, оның 23-і жер астында қалды. Кеншілердің өздері айтқандай, мемориал қаза болған жолдастарының мүрдесі қалған жердің дәл үстінде орнатылған.
Бұдан кейін Шахтинск қаласында Сатыбалды Дәулеталин 17 тамызда «Қазақстан» шахтасында болған өрт кезінде қаза тапқан кеншілердің отбасыларына барды.
Уақыт өте келе қаза тапқан кеншілердің туыстарында «Неге бұл қайғылы оқиға болды?», «Неге барлығы шахтадан шыға алмады?», «Адамдардың өліміне кім жауап береді?», «Асыраушысынан айырылған отбасылар өз проблемаларымен жалғыз қала ма?» деген сұрақтар көбейіп келеді.
ҚРКФ төрағасы Сатыбалды Дәулеталин мен оның «Қорғау» көміршілер кәсіподақ ұйымындағы әріптестері қаза тапқан кеншілердің әйелдері Диана Халикова, Наталья Слюнькова және Камила Старовойтқа кеніштегі апаттан кейін әлеуметтік әріптестер қабылдаған шаралар туралы айтып берді.
«Қазір арнайы үкіметтік комиссия жұмыс істеп жатыр, тергеу органдары да өз жұмысын атқаруда, кеншілердің өліміне кінәлілер тиісті жазасын алуы үшін тергеудің аяқталуын күту керек. Ал әзірше кәсіподақтар жұмыс берушінің қаза болған және зардап шеккен кеншілерге қатысты ұжымдық шарт нормаларын толық сақтауын бақылауға алады. «АрселорМиттал Теміртауда» кәсіподақ ұйымы бұл құжатта өндірістегі топтық жазатайым оқиғалардан зардап шеккен еңбеккерлердің отбасыларына белгілі бір кепілдіктері бар нормаларды қамтитынына көз жеткізді. Бұл 10 жыл жұмыс істегені үшін лауазымдық жалақысына өтемақы төлеу, марқұмның отбасына Қарағанды облысы шекарасында пәтер беру және т.б. Баршамызға қиын-қыстау күндерде сіздерді жалғыз қалдырмаймыз», – деді Сатыбалды Дәулеталин қаза тапқан кеншілердің әйелдеріне.
«Қазақстан» шахтасында қаза тапқандар мен зардап шеккендердің отбасыларына қажетті көмек көрсетуге қатысты барлық мәселелер бойынша жақындары кәсіподақтың толық қолдауына сене алады», – деп қосты «Қорғау» кәсіподақ төрағасы Евгений Буслаев.
Шахтинскідегі кездесулерден кейін Қазақстан Республикасы Кәсіподақтар федерациясының төрағасы әріптестерімен бірге профессор Х.Мақажанов атындағы облыстық көпсалалы ауруханада ем қабылдап жатқан «Қазақстан» кеншілеріне барды.
Аурухана директоры Еркін-Дәуір Құрманғалиевтің айтуынша, зардап шеккен кеншілердің өміріне қауіп төніп тұрған жоқ, 13 науқастың барлығы неврологиялық бөлімде жатыр, оларға тиісті медициналық көмек көрсетілуде.
«Қауіпті кезең бес-жеті күнге созылды. Қазір олардың өміріне қауіп төніп тұрған жоқ. Олар токсикология бөлімінен неврология бөліміне ауыстырылды. Хаттама бойынша кеншілер мұнда екі апта болады. Дегенмен, оларды әлі ұзақ амбулаторлық емдеу мен оңалту күтіп тұр», – деді Еркін-Дәуір Құрманғалиев.
Кеншілердің өздері әлі де жалғасып жатқан бас ауруы мен түнде қорқынышты түс көретініне шағымданып, өрт кезінде қалай құтылғандарын айтып берді.
«Каскалардағы шамдар көмектеспеді, айнала қою түтін болды, ештеңе көрінбегендіктен бір-бірімізге соқтығыстық, дегенмен, бір-бірімізге көмектестік, есімізде қалған жол бойынша жүруді жалғастырдық, осылайша ғана кеңістікті таныдық», – деп тау-кен шебері, механик Валерий Обердерфер көз жасын тыя алмады.
«Қазақстан» шахтасындағы өрттен жер астында қалған кеншілер ғана зардап шекпеді, ауруханада медициналық көмек алып жатқандардың арасында екі әйел бар. Қазандық машинисі Анна Зарусинская мен оператор-табельщик Антонина Шатилова шахтаның бетінде болған, бірақ, олар төбеге көтерілген кеншілерді қабылдап, белгілеген кезде көтерілген түтінге тап болды.
Сатыбалды Дәулеталин зардап шеккен 13 азаматтың әрқайсысымен тілдесіп, кеншілерге тезірек сауығып кетулеріне тілектестік білдірді және оларды санаториялық-курорттық жағдайда одан әрі сауықтыру кәсіподақ ұйымдары тарапынан қолға алынғанын айтты.
«Біз емдеуші дәрігерлермен кеңесіп, сіздерді әрі қарай оңалтуды Бурабайдағы санаториялық-курорттық аймақта жалғастыру керек деп шештік. Емдеу аяқталғаннан кейін біз сіздерге оңалту процедураларынан өту мүмкіндігін беруге дайынбыз. Ең бастысы – оңалу. Сіздер бізге, отбасыларыңызға және жақындарыңызға керексіздер. Біз сіздерге көмектесеміз және сіздердің денсаулықтарыңыз тез қалпына келіп, толыққанды өмірге оралуларыңыз үшін қолдан келгеннің бәрін жасаймыз», – деді ҚРКФ төрағасы.
ҚРКФ медиаорталығы