Медицина қызметкерлері күніне орай Жамбыл облысында сала мамандары арасындағы дәстүрлі облыстық спартакиада биыл да жоғары деңгейде жалауын желбіретті. Салауатты өмір салтын серік еткен ақ халаттылардың дүбірлі додасы 2026 жылғы 13 маусымда Тараз қаласындағы Ж. Үшкемпіров атындағы еңселі «Тараз-Арена» спорт сарайында өтті. Бұл ауқымды спорттық іс-шараны Жамбыл облысы әкімдігінің денсаулық сақтау басқармасы ұйымдастырып, «QazMed» кәсіподағы қоғамдық бірлестігінің Жамбыл облыстық филиалы зор қолдау көрсетті.
Аталған спартакиаданың арқалаған жүгі мен негізгі мақсаты – медицина қызметкерлері арасында салауатты өмір салтын кеңінен насихаттау, бұқаралық спортты жаңа белеске көтеру, еңбек ұжымдарындағы бірлікті нығайту және кәсіби ортада өзара сыйластық пен достық қарым-қатынасты арттыру.
Жарыстың ашылу салтанаты ерекше рухта өтіп, Жамбыл облысы денсаулық сақтау басқармасының басшысы Сержан Назарбек қатысушыларды кәсіби мерекемен құттықтады және медицина қызметкерлерінің қоғамдағы айрықша рөліне тоқталды. Ол өз сөзінде спорттың денсаулықты нығайтудағы, еңбек қабілетін арттырудағы және ұжымдық ынтымақтастықты күшейтудегі мәнін ерекше атап өтіп, жарыс көрігін қыздырған спортшыларға сәттілік пен жоғары нәтижелер тіледі.
Сондай-ақ салтанатты жиында арнайы шақырылған құрметті қонақтар – «Жамбыл облысы кәсіподақтар орталығы» аумақтық кәсіподақтар бірлестігі төрағасының орынбасары Бақтияр Қарауылов, «QazMed» кәсіподағы республикалық қоғамдық бірлестігінің атқарушы хатшысы, Түркістан облыстық «Денсаулық» кәсіподағының төрағасы Сәкен Қатбаев, медицина саласының ардагері Ләззат Оңғарқызы және «QazMed» кәсіподағының Жамбыл облыстық филиалының төрағасы Нұрлан Махашов жылы лебіздерін білдіріп, қатысушылардың қадамына сәттілік пен табыс тіледі.
Денсаулық сақшылары бұл жолы тек өз мамандықтарының ғана емес, спорттың да хас шебері екенін дәлелдеді. Облыстың медициналық ұйымдарынан құралған «Бәйтерек», «Ұлы дала», «Бірлік», «Достық», «Қыран», «Шипагер» және «Жігер» командалары спорттың алты түрі бойынша өзара бақ сынасты. Атап айтқанда, футбол, волейбол, жеңіл атлетика, шахмат, тоғызқұмалақ және үстел теннисі бойынша тартысты да қызықты жарыстар өтті.
Спартакиада барысында қатысушылар өздерінің жоғары дайындық деңгейін көрсетіп, командалық рух пен өзара қолдаудың жарқын үлгісін танытты. Командалық спорт түрлерінде ұйымшылдық пен бірлік айқын байқалса, жеке сындарда әр спортшының шеберлігі мен жеңіске деген табандылығы көрініс тапты.
Боз кілем мен жасыл алаңдағы тартысты ойындардың қорытындысы бойынша футболдан «Достық» командасы І орынды иеленсе, «Шипагер» ІІ орынды, ал «Бәйтерек» командасы ІІІ орынды жеңіп алды. Волейболдан «Ұлы дала» командасы жеңімпаз атанса, «Бәйтерек» ІІ орынға, «Достық» ІІІ орынға ие болды.
Жеңіл атлетикадан ерлер арасында «Бәйтерек» І орын, «Бірлік» ІІ орын, «Достық» ІІІ орын иеленді. Әйелдер арасында «Бірлік» І орын, «Бәйтерек» ІІ орын, «Жігер» ІІІ орынды еншіледі.
Интеллектуалдық сындар да тартысты өтті. Шахмат сайысында ерлер арасында «Достық» жеңімпаз атанса, әйелдер арасында «Бәйтерек» І орынды иеленді. Тоғызқұмалақтан ерлер арасында «Достық», әйелдер арасында «Бірлік» командалары қарсылас шақ келтірмей үздік шықты. Үстел теннисінен ерлер арасында «Бәйтерек», әйелдер арасында «Ұлы дала» командалары жеңіске жетті.
Спорттық шараның жоғары деңгейде өтуіне демеушілер де елеулі үлес қосты. Футбол жарысының жүлдегерлері «Сарыбас» компаниясының демеушілігімен арнайы қаржылай сыйақылармен марапатталды.
Ал «Банк ЦентрКредит» демеушілігімен жалпы командалық есеп қорытындыланып, спартакиаданың бас жеңімпазы болып «Бәйтерек» командасы танылды. ІІ орын «Достық» командасына бұйырса, ІІІ орын «Ұлы дала» командасына бұйырды. Жеңімпаз командаларға қомақты қаржылай сертификаттар табысталды.
Жарыстың барлық жеңімпаздары мен жүлдегерлері кубоктармен, медальдармен, дипломдармен және арнайы сертификаттармен салтанатты түрде марапатталды.
Аумақтық кәсіподақтар бірлестігі еңбек адамдарының денсаулығын нығайтуға, бұқаралық спортты дамытуға және әлеуметтік әріптестікті жетілдіруге бағытталған мұндай бастамаларды әрдайым барынша қолдайтынын жеткізді. Медицина қызметкерлері арасындағы спартакиада – ұжымдық бірлікті арттырып, салауатты өмір салтын насихаттаудағы маңызды әрі дәстүрлі шаралардың бірі.
Бұл спорттық мереке медицина қызметкерлерінің кәсіби беделін асқақтатып қана қоймай, олардың бірлік пен ынтымаққа негізделген ортақ құндылықтарын тағы бір мәрте айқындап берді.