Павлодар облысындағы «QAZAQMETAL KÁSIPODAǴY» салалық тау-кен металлургия кәсіподағының жетекшілері маңызды жиын өткізді. Онда кәсіподақ белсенділері алғашқы жартыжылдықты қорытындылап, алдағы алты айға арналған нақты жоспарларын бекітті.
Жиынды Қазақстан салалық тау-кен металлургия кәсіподағы төрағасының Павлодар облысы бойынша орынбасары Раушан Даумова жүргізді. Оның айтуынша, алты ай сайын осылай бас қосып, атқарылған істі саралау және алдағы міндеттерді айқындау әдісі өзінің тиімділігін әлдеқашан дәлелдеген.
«Біз үшін кәсіподақ ұйымдары арасындағы тұрақты байланысты сақтау, тәжірибе алмасу және ең өзекті мәселелер бойынша бірлескен шешімдер қабылдау өте маңызды. Басты назарды әрдайым еңбек қауіпсіздігі мен еңбекті қорғауға, жеке еңбек дауларын уақытында шешуге, келісім комиссияларының жұмысына, жұмысшылардың денсаулығын түзеуі мен демалысын ұйымдастыруға, сондай-ақ жұмыс берушілермен әлеуметтік әріптестікті дамытуға аударамыз», – деді Раушан Даумова.
Басқосу барысында аймақтағы ірі өндіріс орындарының, атап айтқанда, «Қазақстан алюминийі» АҚ, «Қазақстан электролиз зауыты» АҚ, «ERG Service» ЖШС және «KSP Steel» ЖШС бастауыш кәсіподақ ұйымдарының жетекшілері сөз алды. Олар өз кәсіпорындарындағы ұжымдық шарттардың қалай орындалып жатқанын, жұмысшылардың құқықтарын қорғау шаралары мен жұмыс берушілермен арадағы байланыстың қалай өрбіп жатқанын баяндап берді.
Бұл жиында биылғы маусым айында күшіне енген Еңбек заңнамасындағы жаңа өзгерістер ерекше талқыланды. Енді заң бойынша еңбекті қорғау жөніндегі техникалық инспекторлардың рөлі мен құқығы айтарлықтай күшейтілді. Осыған байланысты кәсіподақ ұйымдарына еңбек ұжымдарында түсіндіру жұмыстарын жүргізу, техникалық инспекторлар туралы ережелерді жаңарту және ішкі тәртіп регламенттеріне қажетті өзгерістер енгізу міндеті жүктеліп отыр.
Айта кету керек, бүгінде Павлодар облысындағы «QAZAQMETAL KÁSIPODAǴY» құрамына кіретін кәсіпорындарда еңбекті қорғау саласын 300-ден астам техникалық инспектор қадағалайды. Бұл мамандар күн сайын өндіріс алаңдарында тікелей жұмыс істеп, жазатайым оқиғалардың алдын алады, қауіпті тұстарды анықтайды және мыңдаған жұмысшының аман-есен үйіне оралуына септігін тигізеді.
Кездесу соңында кәсіподақ белсенділерін бірлесіп оқыту туралы маңызды келісім жасалды. Алдағы уақытта ұйымдастырылатын оқу бағдарламалары жаңартылған еңбек заңнамасының ережелерін іс жүзінде дұрыс қолдануға, қоғамдық бақылауды дамытуға және аймақ кәсіпорындарындағы әлеуметтік әріптестік жүйесін одан әрі нығайтуға бағытталмақ.