Павлодар облысының Кәсіподақтар орталығының алаңында «Азаматтарға арналған үкімет» мемлекеттік корпорациясы Павлодар облыстық филиалының келісу комиссиясының мүшелеріне арналған оқыту семинары өтті. Оқудан еңбек ұжымының 8 өкілі өтті.
Семинардың негізгі мақсаты – қатысушыларға еңбек заңнамасы саласында қажетті білім беру ғана емес, сондай-ақ оларды жеке еңбек дауларын қарау және шешу бойынша практикалық жұмысқа дайындау.
Оқыту бағдарламасына еңбек заңнамасы, медиация негіздері және жеке еңбек дауларын шешудің ерекшеліктері енгізілді. Семинардың елеулі бөлігі келісу комиссиясының қызметінің практикалық аспектілеріне арналды. Қатысушылар комиссия қызметі туралы келісімді әзірлеу тәртібін, оның жұмысын ұйымдастыру ерекшеліктерін, комиссия мүшелеріне берілетін кепілдіктерді жан-жақты талқылады, сондай-ақ өңір кәсіпорындарының үздік тәжірибелерімен танысты.
Сот тәжірибесіне арналған тақырып ерекше қызығушылық тудырды. Екібастұз қалалық сотының судьясы Айгерім Жүнісова қатысушыларға соттардың еңбек дауларын қарау кезіндегі тәсілдері туралы айтып, жиі кездесетін даулы жағдайларға және оларды шешудің белгіленген тәртібін сауатты сақтаудың маңыздылығына назар аударды.
Оқытудың теориялық және практикалық бөлімдерін сот жүйесінің ардагері, Павлодар облысының Кәсіподақтар орталығы жанындағы «Татуласу орталығының» жетекшісі Марина Иванова жүргізді. Практикалық кейстер негізінде қатысушылар алған білімдерін қолданып, келісу комиссиясы өз жұмысында кездесуі мүмкін нақты жағдайларды талдап шықты.
Оқыту қорытындысы бойынша қатысушылар тестілеуден өтті. Сертификат алу шарты – тест тапсырмасын сәтті орындау болды, яғни кемінде 70% дұрыс жауап беру қажет болды.
Қатысушыларды оқуды сәтті аяқтап, сертификаттар алуымен Павлодар облысының Аумақтық кәсіподақтар бірлестігінің төрайымы Динара Айтжанова құттықтады.
Ол оқыту – практикалық жұмыстың тек бастамасы екенін және Кәсіподақтар орталығы алдағы уақытта да келісу комиссияларының мүшелеріне қолдау көрсетуге дайын екенін атап өтті.
«Біз тыңдаушыларымызбен байланысты үзбейміз. Кез келген мәселе бойынша әрдайым бізге жүгіне аласыздар – біз сіздерге тәжірибелік жұмыста қолдау көрсетіп, көмек көрсетуге дайынбыз. Ашық жұмыс істеу, еңбек ұжымымен тұрақты байланыс орнату өте маңызды. Әрбір қызметкер өз құқықтарын біліп, оларды қалай қорғау керектігін түсінуі тиіс. Әр адам келісу комиссиясының қай жерде орналасқанын, кімге жүгіну керектігін және өтінішті қалай беру қажет екенін білуі керек.
Еңбек дауларынан қорқудың қажеті жоқ. Ең бастысы – оларды құқықтық алаңда, сындарлы диалог арқылы және әділдік қағидаттарына сүйене отырып дұрыс әрі сауатты шеше білу. Келісу комиссиясының негізгі міндеттерінің бірі де – тараптардың бір-бірін тыңдауына көмектесу, еңбек қатынастарын сақтауға және әділдікті қалпына келтіруге мүмкіндік беретін шешім табуға жәрдемдесу», – деді ол.
Келісу комиссиялары мүшелерін оқыту – әлеуметтік әріптестікті дамытудың маңызды құрамдас бөлігі. Білікті әрі тиімді жұмыс істейтін келісу комиссиясы туындайтын еңбек дауларын өркениетті жолмен шешуге, қызметкерлер мен жұмыс беруші арасындағы сенімді нығайтуға және ұйымдарда ашық диалог мәдениетін қалыптастыруға мүмкіндік береді.