Еңбек – адам өміріндегі жауапкершілік пен табандылықты талап ететін үлкен жол. Өз ісіне адал болып, кәсібін абыроймен атқарып жүрген жандардың еңбегі әрдайым құрметке лайық. Сондай еңбек адамдарының бірі – спорт саласында қызмет етіп келе жатқан Меруерт Сүйіндікқызы Мәмбетова.
Меруерт Сүйіндікқызы 1991 жылы Қарағанды облысы Нұра ауданының Жанбөбек ауылында көпбалалы отбасында дүниеге келген. Ауылдағы орта мектепті 2008 жылы тәмамдап, сол жылы Астана қаласындағы «Көлік және коммуникациялар колледжіне» оқуға түсіп, «Экономика, бухгалтерлік есеп және аудит» мамандығын меңгерді. 2011–2014 жылдары Қарағанды қаласындағы «Болашақ» жеке кәсіпорнының «Экономика» факультетінде білім алып, жоғары білім туралы дипломға ие болды.
Еңбек жолын 2010 жылы Қорғалжын ауылындағы «Аудандық мәдениет үйі» МКҚК-да бухгалтердің көмекшісі қызметінен бастады. Ал 2013 жылдан бастап «Жоғары спорт шеберлігіне мамандандырылған мектеп» МКҚК-да бухгалтер болып еңбек етті. Кейін Целиноград ауданындағы Ақмол ауылында орналасқан «Жас-Шабыт» балалар шығармашылығы орталығы» МКҚК-да кәсіби тәжірибесін жалғастырды.
Жылдар өте келе жинақтаған тәжірибесі мен кәсіби білімі Меруерт Сүйіндікқызына қаржылық есеп пен ұйым жұмысын жүйелі жүргізуге мүмкіндік берді. 2023 жылы Астана қаласы әкімдігінің «Бұқаралық спорттық іс-шараларды өткізу дирекциясы» КММ-де бас бухгалтер қызметін атқарды. Кейін мекеменің атауы мен құрылымының өзгеруіне байланысты Астана қаласы әкімдігінің «Бұқаралық спорт түрлері бойынша спорт клубы» КММ-де еңбек жолын жалғастырды.
Бүгінде Меруерт Мәмбетова спорт саласындағы мекемеде бас бухгалтер қызметін атқарып келеді. Бухгалтердің жұмысы мұқияттылықты, дәлдікті, жоғары жауапкершілікті және ұқыптылықты талап етеді. Бұл қасиеттер оның күнделікті еңбегінің басты ұстанымына айналған.
«Өз ісіңе жауапкершілікпен қарау – кәсібиліктің негізі» деген қағиданы берік ұстанатын ол өзіне жүктелген міндеттерді сапалы әрі тиянақты орындауға мән береді. Ұжымдағы әріптестері де оны жауапкершілігі мол, елгезек, мақсатшыл және өз ісіне берілген маман ретінде бағалайды.
Меруерт Сүйіндікқызы үшін еңбек – тек кәсіби міндет емес, сонымен қатар ұжымдық жауапкершілік пен ортақ іске үлес қосудың мүмкіндігі. Осы ұстанымымен ол кәсіподақ жұмысына да белсенді араласып келеді.
2023 жылдан бастап кәсіподақ комитетінің мүшесі. Қазіргі таңда кәсіподақ комитетінің құрамында болып, тексеру комиссиясының мүшесі ретінде қоғамдық жұмыстарға атсалысуда. Қызметкерлердің еңбек құқықтары мен әлеуметтік мүдделерін қорғауға бағытталған кәсіподақ бастамаларына белсенді қатысып, ұйым жұмысының дамуына өз үлесін қосып келеді.
Меруерт Сүйіндікқызының өміріндегі ең маңызды құндылықтардың бірі – отбасы. Ол тұрмыста, көпбалалы ана. Төрт баланы – егіз қыздарын, қызын және ұлын тәрбиелеп отыр. Кәсіби қызмет пен отбасылық жауапкершілікті қатар алып жүру – үлкен төзімділік пен табандылықты қажет етеді. Балаларына өнегелі тәрбие беріп, еңбекқорлық пен жауапкершіліктің маңызын өз ісімен көрсетіп келеді.
Еңбек жолын қарапайым бухгалтердің көмекшісі қызметінен бастаған Меруерт Мәмбетова бүгінде спорт саласында тәжірибелі бас бухгалтер ретінде еңбек етіп келеді. Оның кәсіби жолы – білімге ұмтылудың, еңбектенудің, тәжірибе жинақтаудың және өз ісіне адал болудың үлгісі.
Еңбекпен келген жетістік – маңдай термен келген абырой. Ал өз ісін сүйіп атқаратын, ұжымына пайдасын тигізіп, қоғамдық жұмыстарға белсенді араласатын жандардың еңбегі әрдайым ел игілігіне қызмет етеді.