Ағымдағы жылдың 9 тамыз күні кітапқұмарлар күніне орай Қазақстан Республикасы Кәсіподақтар федерациясы жанынан «ProfBookClub» кітапқұмарлар клубының бірінші жиыны өткен болатын.
Кітап оқуға қызығушылықты насихаттау және интеллектуалдық деңгейін жоғарылату арқылы еңбеккер жастарды біріктіру мақсатында Қарағанды облысы Кәсіподақ Орталығының «Келешек» Жастар кеңесі мен Татуласу Орталығының ұйымдастыруымен «ProfBookClub – Karaganda» кітапқұмарлар клубы ашылды.
Бірінші жиынның құрметті қонақтары Қазақстан Республикасы Кәсіподақтар федерациясы жанындағы «Келешек» Жастар кеңесінің төрағасы Еспенбет Қалшора, «Харизма плюс» ЖМ директоры Олег Пихтеев, «ZOLOTAYA SEREDINA» ҚБ Медиация Орталығының жетекшісі Оксана Макеева, Қазақстан IT индустриясы саласындағы жас кәсіпкер Абай Отарбаев өз саласының қыры мен қызықтары туралы бөлісіп, тәжірибесі мен талғамдарына қарай кітаптар тізімін ұсынды.
Қарағанды облысы Кәсіподақ Орталығындағы Татуласу Орталығының жетекшісі Света Шардарбекова және «Келешек» Жастар кеңесінің төрайымы Дария Хамитжанова салалық кәсіподақтар жастарының басын қосқан кітапқұмарлар клубының маңыздылығын айтып, алдағы жоспарлармен бөлісті. Бұл бастама қатысушылар арасында қолдауға ие болып, жалғастыру мақсатында келесі жиын тақырыптары талданды.
Кітап клубының жұмысы аяқталған соң Еспенбет Қалшора іс-сапар бағдарламасына сәйкес Қарағанды облысындағы денсаулық сақтау, білім және ғылым, мәдениет және спорт, мемлекеттІк қызмет саласының жас мамандарымен кездесіп, еңбеккер жастардың мүддесін қорғау аясындағы сұрақтарына жауап беріп, «Келешек» Жастар кеңесінің жұмысын әрі қарай дамыту мақсатындағы ұсыныстарын қарастырды.