3 қазан күні Батыс Қазақстан облысының Кәсіподақтар орталығы Халықаралық қарттар күні аясында облыстың кәсіподақ саласында ұзақ жылдар бойы еңбек еткен, өңіріміздегі кәсіподақ қозғалысының дамуына зор үлестерін қосқан, қазіргі уақытта зейнеткерлік демалыстағы салалық кәсіподақтардың ардагерлерімен кездесу өткізді.
БҚО Кәсіподақтар орталығының төрайымы А.Есекенова өз сөзінде облыстың салалық кәсіподақтары атынан ардагерлерді құттықтап, олардың осы саладағы қалдырған ізі мен мол тәжірибесі әрқашан келер ұрпаққа жарқын үлгі болатыны туралы айтып, әркез құрмет пен қошеметке бөленіп ортамыздан табылыңыз деген жылы лебіздерін білдірді.
Басқосуда ардагерлер өз еңбек жолындағы кәсіподақ саласында қызмет атқарған жылдардан естеліктерімен бөлісіп, домбыра күмбірімен әуелеген әсем ән-мен күй тыңдап, бүгінгі таңдағы кәсіподақтың дамуы мен көркеюіне еңбек етіп жүрген ізбасарларына сәттілік тіледі. Кездесу соңында ардагерлерге Кәсіподақтар орталығының атынан арнайы сыйлықтар табыс етіліп, естелік суреттер жасалды.
Үлкенге – ізет, кішіге – құрмет көрсету – ата-бабамыздан қалған мұра, ал ұрпақтар сабақтастығы осындай бір-бірімізге жылу мен шуаққа толы көңіл-күй сыйлайтын кездесулермен жалғасын таппақ.