Қазіргі заман талабына сай кітапханалар қызметі ақпараттық технологияларды енгізу арқылы оқырмандарға қызықты және пайдалы ақпаратты жеткізу үшін қолайлы тәсілдерді қолдануды қарастырады.
Осы орайда елордадағы «Орталықтандырылған кітапханалар жүйесі» мен оның бастауыш кәсіподақ ұйымының бастамасымен «Қазақ радиосының» 100 жылдығы аясында өзінің оқырмандары мен ізденімпаз аудиториясына «Kitap_kala» ғаламтор- радио арнасын іске қосады.
«Ғаламтор-радионы ашудағы алға қойған мақсатымыз – қала тұрғындары мен оқырмандарымызға кітапхана қорындағы рухани байлығымызды насихаттай отырып, өскелең ұрпақты өнеге мен білімге, патриоттыққа, ізгілік пен бауырмалдыққа баулитын баға жетпес құнды мұраларымыздан үзінділер ұсыну және ұлттық әдет-ғұрпымызды дәріптейтін, тәрбиелік мәні зор іс-шараларымызбен таныстыру», – дейді «Орталықтандырылған кітапханалар жүйесінің» директоры Гүлбадан Мадибаева.
Бастауыш ұйым төрайымы Шынар Үстенбекованың айтуынша, әзірге аптасына үш рет әлеуметтік, қоғамдық және балаларға арналған хабарлар ұсынылады. Радио хабарларды интернет желісінің “Kitap_kala” ютуб каналынан тыңдауға болады.
12 наурыз күні радио арнаның ашылу рәсіміне Қазақ радиосының ардагері Күләш Молдахметова, ҚР Жазушылар одағының «Нұр – Сұлтан» қаласы филиалы төрағасы, ақын Дәулеткерей Кәпұлы, ҚР еңбек сіңірген қайраткері, «Астана» радиосының директоры Сымбат Талғатқызы қатысады деп күтілуде.