Қазақстандық салалық білім және ғылым қызметкерлері кәсіподағының бастауыш ұйымы – Оқушылар сарайының ұйымдастыруымен Қазақстан Республикасының Тәуелсіздігінің 30 жылдығына арналған «BAQYTTY QAZAQSTAN» атты I халықаралық балалар және жасөспірімдер арасында өнер конкурсы өтті.
Бұл байқауға еліміздің әр аумағынан өнерлі балалар қатысып, көркемсөз, вокал, хореография және бірнеше номинация бойынша сайысқа түсті. Аталмыш байқауға 100-ден аса өтініш келіп түскен, олар жас ерекшеліктері бойынша өнерлерін көрсетіп, қазылардың да, көрермендердің де көңілін аулады.
Конкурсқа Қазақстандық салалық білім және ғылым қызметкерлері кәсіподағының Түркістан облыстық ұйымы демеушілік жасады, бір күнге созылған сайыста көзге түсіп, ерекше өнер көрсеткен әрбір қатысушыға арнайы дипломдар мен медальдар табысталды.
Елбасы Н.Назарбаевтың «Болашаққа бағдар: Рухани жаңғыру», «Ұлы даланың жеті қыры» бағдарламасы аясында ұйымдастырылып отырған байқаудың мақсаты – дарынды балаларды, жасөспірімдер мен жастарды анықтау, қолдау көрсету, ұлттық өнеріміздің қыр-сырына баулып, үлкен сахнада өнер көрсетуіне ықпал жасау, жаңа өнер иелерін табу, халықаралық деңгейде шығармашылық байланыстарды орнату.