Бүгінде білім беру саласында көп нәрсе өзгерді, дегенмен мұғалім – оқушысына үлгі болатын шебер болып қала бермек. Нағыз шебер өз шәкіртіне сенім білдіреді, оларға алға жылжуға мүмкіндік береді, өсіп-жетілуіне ықпал етеді.Үздік мұғалім – ол кез келген білім беру мекемесінің тірегі.
Ойыл қазақ орта мектебінің тарих пәнінің мұғалімі Сисенғалиева Люба Хамитқызы – іскерлігі мен ұйымдастырушылық қабілеті жоғары, өзіне тән ұстаздық өрнегін таныта білген шебер мамандардың бірі. Люба Хамитқызы – деңгейі жоғары кәсіби шеберлігі мен дүниетанымы терең, шығармашыл ұстаз. Ұстаз еңбегі де елеусіз емес. Қазақстан Республикасының Білім және ғылым министрлігінің Құрмет грамотасымен және бірнеше мәрте облыстық, аудандық, мектепішілік грамоталармен марапатталды. «Үздік жыл мұғалімі» , «Жыл жетекшісі» байқауларының жеңімпазы. «Білім және ғылым қызметкерлерінің кәсіподағына сіңірген еңбегі үшін» күміс төсбелгісінің иегері. Қазақстан Республикасы педагог кадрларының біліктілігін арттырудың деңгейлі бағдарламасы аясында бірінші деңгей бағдарламасы бойынша оқыту курстарын аяқтады. Ауданның алғашқы көшбасшыларының бірі, мектеп тренері, педагог-зерттеуші.
«Адамның адамшылығы – жақсы ұстаздан», – деп ұлы Абай айтқандай, мұғалім тәрбиесі мен өнегесі оқушының болашақ азығы. Оқушылары республикалық, облыстық, аудандық сайыстардан жүлделі орындар алды. «Оқушылардың шығармашылық қабілетін дамыту» тақырыбында шығармашылықпен жұмыс атқарып, оны үнемі сабақта қолдануда.
Мол тәжірибе жинақтаған ұстаз заман талабына сай икемделіп, қашанда тың ізденістерге ұмтылудан жалыққан емес, сондықтан оқушылардың пәнге деген қызығушылығын оятуға, шығармашылық қабілеттерін оятуға бойындағы барлық күш жігерін жұмсап келеді. Люба Хамитқызының өткізген ашық сабақтары, өнеге сағаттары, сыныптан тыс тәрбие жұмыстары, семинар, конференцияларда көрсеткен тәжірибелері жоғары бағаланып, аудан мұғалімдері арасында кеңінен таратылып отырады.
Сонымен қатар, Люба Хамитқызы бастауыш кәсіподақ ұйымының төрайымы. Мектептегі қоғамдық жұмыстарға да белсене араласады. Білімін үнемі жетілдіріп отыратын, білім мен тәрбиені ұштастырған ұлағатты ұстаз. Люба Хамитқызы – адами қасиеті мол басқаға қайырым тигізуден шаршамайтын, ұрпағының ертеңіне жол ашатын, шуағы мол шапағат иесі. Оның ой өрісінің кеңдігі, жоғары жұмыс қабілеттігі, кәсіптік мүддесінің жан-жақтылығы оны әріптестері мен оқушыларының құрметіне ие етеді. Өмірі өнегемен өрілген ұлағатты ұстаз, отбасында ұл, қыз өсіріп отырған ардақты ана.