Қызылорда облысы аумақтық кәсіподақтар бірлестігі облыстық салалық кәсіподақтармен бірлесе Наурыз мерекесін атап өтті. Жиында домбыраның күмбірімен көмкерілген мерекелік көңіл-күй орнап, Наурыз көжеден дәм татылды. Әз-Наурыздың берекелі дастарханында кәсіподақ ардагерлері Жыл басына жақсы тілектер арнап, аймақта кәсіподақтар жүйесінің дамуына қызмет жасап жүрген ізбасарларына ақжарма баталарын берді.
«Қазірде кәсіподақтар қызметіне қойылатын талаптар жан-жақты. Еңбекшілердің мүддесіне жасайтын жұмыстарыңыз сәтті бола берсін. Наурыз елге береке, отбасыларыңызға шаттық әкелсін», – деп тілек арнады денсаулық сақтау жүйесі кәсіподағының құрметті ардагері Ақмырза Сыдықұлы. Сонымен қатар, Кәсіподақ ардагерлері облыстық кәсіподақтардың тарихи сәттері мен еңбек жылдары естеліктерімен бөлісті.
Наурыз мерекесінде аумақтық кәсіподақтар бірлестігі төрағасы Мақсұт Нәлібаев, облыстық салалық кәсіподақ ұйым төрағалары да мерекелік лебіздерін білдірді.