«Ұстаз» деген ұлы ұғымға лайық болып, саналы ұрпақ тәрбиелеп, сапалы маман дайындаудың тәсілдерін меңгеріп, сондай-ақ, кітаптағы білім мен өмір иірімдерін үйлестіріп жүрген ұстаздардың бірі – Алға ауданының Қайыңдысай негізгі мектебінің биология пәнінің мұғалімі Жампейсова Светлана Жеткергенқызы.
30 жылдан астам еңбек жолында кәсіби дараланған маман ғибратты ғұмырының қымбат шақтарын шәкірттерін оқыту мен тәрбиелеу ісіне арнап келеді. Аталмыш салада қызмет етіп жүрген ұстаздың бойынан біліктілікке талпыну әлі де байқалады. Ұстаздың қарапайымдылығы мен ұқыптылығы, еңбекке деген аса ынтызарлығы өзгелерден оны ерекшелендіреді.
Светлана Жеткергенқызының шәкірттері – қала, облыс, республика мен халықаралық байқаулар мен пәндік олимпиадалар мен ғылыми жобалардың жеңімпаздары. Оның оқушылары «Зерде» атты шығармашылық жобалар мен зерттеу жұмыстары байқауының аудандық кезеңінде ІІІ орын, «Оқуға құштар мектеп» жобасы аясында өткізілген «Туған жерім Қазақстанды жақсы білесің бе?» атты байқауында аудан бойынша І орын, облыс бойынша ІІІ орынды жеңіп алса, «Ақ бота» интеллектуалдық марафонының ІІ дәрежелі дипломға және облыстық олимпиадада биология пәнінен ІІ дәрежелі дипломға ие болды.
Светлана Жампейсова Ақтөбе облыстық ғылыми тәжірибелік орталығының «Білімі мен шығармашылық шеберлігі» үшін Алғыс хатымен, Ақтөбе облыстық білім басқармасының «Оқу-тәрбие ісіндегі үздік жетістіктері» үшін Алғыс хатымен, «Қазақстандық салалық білім және ғылым қызметкерлері кәсіптік одағының Ақтөбе облыстық ұйымы» қоғамдық бірлестігінің «Білім беру жүйесіндегі жемісті еңбегі» үшін Құрмет грамотасымен және республикалық пәндік олимпиадада І дәрежелі дипломмен, облыстық пәндік олимпиадада ІІ дәрежелі дипломмен, «Білікті педагог» атты олимпиаданың ІІ дәрежелі дипломымен марапатталған маманның тізбектелген жетістіктері – тек қана адал еңбек пен біліктіліктің жемісі.