Қазақстан Республикасы Кәсіподақтар федерациясының төрағасы Сатыбалды Дәулеталин жұмыс сапарымен еліміздің батыс өңірлеріне барып, су тасқынынан зардап шеккен кәсіподақ мүшелерімен жеке кездесіп, туындаған мәселелерді талқылап, оларды шешуге жәрдемдесті.
«Батыс Су арнасы» ЖШС-нің дәнекерлеушісі – кәсіпорынның жергілікті кәсіподақ мүшесі Самиғолла Бекетов Батыс Қазақстан облысына жұмыс сапарымен келген Кәсіподақтар федерациясының төрағасынан көмек сұрады.
Саяжайда орналасқан Бекетовтар отбасының үйін су басқан. Енді ол, екі баласы және әйелі эвакуациялық пунктте тұруға мәжбүр.
«Бір айға жуық біз отбасымызбен эвакуациялық орталықта тұрып жатырмыз. Үйімізді су басқан соң, қиын жағдайға тап болдық. Су тасқынының кесірінен жалғыз баспанамыз бен дүние-мүлкімізден айырылдық. Біздің қанша өтініш жасағанымызға қарамастан, тұрғын үй мен мүлікке келтірілген залалды анықтау жөніндегі арнайы комиссияның жұмысы ұзаққа созылып, әзірге үйді қалпына келтіруді және шығынды өтеуді талап ете алмаймыз. Мен отбасымда жалғыз асыраушымын, екі бала тәрбиелеп отырмын. Қазіргі уақытта жұбайым еңбекке жарамсыз, ауыр дертке шалдыққан. Бірақ оны мүмкіндігі шектеулі адамдар қатарына қоспағандықтан, жәрдемақыны да ала алмаймыз. Қазір қаржылық жағдайдың ауыр болуына байланысты уақытша баспанадан шығып, тұрғын үйді жалдауға мүмкіндігіміз жоқ», – деп Самиғолла Бекетов өз жағдайын түсіндірді.
Кәсіподақтар федерациясының төрағасы Сатыбалды Дәулеталинмен кездесу дәнекерлеуші мен оның отбасы үшін маңызы зор болды.
Мәселені тыңдап, Сатыбалды Дәулеталин жағдайдың күрделілігін түсінетінін, мәселені шешуді жеке бақылауға алынатынын мәлімдеді.
ҚРКФ басшысы Батыс Қазақстан облысы Кәсіподақ орталығының төрағасы Айгүл Есекеноваға әлеуметтік әріптестік аясында келтірілген залалды бағалау мәселесін шешуге көмек көрсетуді тапсырды.
Кәсіподақтар федерациясының төрағасы қызметкердің отбасына материалдық көмек көрсетіп, қолдау білдірді.
«Кәсіподақтар үшін жұмысшылар мен олардың отбасы мүшелерінің мүдделерін қорғау – әрдайым бірінші орында. Су тасқынының залалын бағалау – адамдардың әл-ауқатын қалпына келтірудің негізгі қадамы. Бұл жерде әрбір іс жеке және әділетті түрде барлық факторларды, соның ішінде мүліктен айырылу, табыс деңгейі және өмір сүру жағдайларын ескере отырып қарастырылуы маңызды. Кәсіподақтар жағдайды жан-жақты зерттеп, қажетті құқықтық қолдау көрсетіп, мәселені жергілікті атқарушы органдармен бірлесе отырып шешуге ықпал ететін болады», — деді Сатыбалды Дәулеталин.
Кәсіподақтар федерациясы төрағасының қолдауы қызметкерді жігерлендірді.
«Бүгінгі кездесу біздің ауыртпалығымызды жеңілдетіп қана қоймай, жарқын болашаққа сенім ұялатты. Кәсіподақтар федерациясының төрағасына осы мәселеге көңіл бөліп, мәселені шешуде жанұямызға қолдау білдіргені үшін алғыс айтамын», – деп ризашылығын білдірді Самиғолла Бекетов.
ҚР Кәсіподақтар федерациясының медиа орталығы