Ш.Берсиев атындағы Ақтөбе Жоғары аграрлық-техникалық колледжінің директоры Қасымбек Алдияровты зейнеткерлік демалысқа шығарып салуға арналған салтанатты рәсім өтті. Тағылымды іс-шараға әріптестері, ұстаздар мен шәкірттері, замандастары қатысты. Салтанатты жиын барысында Қасымбек Алдияровтың өмір жолы мен білім саласындағы еңбектері, жетістіктері баяндалды.
Айта кетейік, Қасымбек Алдияров – физика-математика ғылымдарының кандидаты, педагогика ғылымдарының докторы, Қазақстан педагогикалық ғылымдар академиясының академигі, Қазақстан Республикасының білім беру ісінің құрметті қызметкері, Ы.Алтынсарин төсбелгісінің иегері, Құрмет орденінің иегері.
Басқосуда “Қазақстандық салалық білім және ғылым қызметкерлері кәсіптік одағының Ақтөбе облыстық ұйымы” қоғамдық бірлестігінің маманы Айжарық Серімбетов ұйым төрағасының құттықтауын жеткізіп, облыстық ұйымның атынан шипажайға жолдама сертификаты мен салалық кәсіподақ ұйымының “Әлеуметтік әріптестікті дамытуға қосқан үлесі үшін” төсбелгісін табыстады.
Жиында әріптестері өздеріне жұмыс бабында жанашыр ақылшы, тағылымды тәлімгер бола білген Қасымбек Төлеуұлы туралы тебірене сөз сөйлеп, игі тілектерін білдірді.
«Өмір жолында бойына жинаған үлкен тәжірибе-білімімен көптеген жас мамандар бөлісіп, тәлімгер, ұстаз бола білді. Колледж ұжымының заман талабына сай жұмыс жасауына өлшеусіз үлес қосқан білікті басшы болды», – дейді, колледж ұжымы. Шараға жиналғандар Алдияров Қасымбек Төлеуұлының көптеген жылдар бойы кәсіби, парасаттылық пен адалдықтың үлгісі бола отырып, өз жұмысын адал атқарғанын жеткізді.
Кеш соңы естелік суретке түсумен ұласып, құттықтау соңы мерекелік шарамен жалғасты.