Қызылордада «Қазпошта» акционерлік қоғамының облыстық ұйымы ұжымы Қазақстан поштасының 150 жылдығы мен Дүниежүзілік пошта күнін атап өтті.
Мерекелерге арналған шарада ұжым жұмыскерлері арасында ұлттық ойындар спартакиадасы және тимбилдинг ұйымдастырылды. Ұлттық ойындар сайысына 5 аудандық поштаның және қалалық 2 бөлімше командасы қатысып, күш сынасты. Ойындар нәтижесімен командалық есеппен жүлделі 1 орынды Жаңақорған аудандық пошта байланыс торабы командасы, 2-ші және 3-ші орындарды Қызылордалық пошташылар командалары иемденді.
Жеңімпаздар мен барлық еңбек ұжымын облыстық филиал директоры Ғалымжан Кенжебаев, аудандық пошта басшылары, кәсіподақ ұйымы төрағасы Айгүл Аблаева құттықтап, марапаттар табыстады. Жүлделі орын иегері командаларға жүз мың, елу және отыз мыңдық қаржылай сыйлықтар мен арнайы дипломдар табысталды.
