Гүлсім Меңдалина – «Ақтөбе нан» серіктестігінде 39 жылдан бері еңбек етіп келеді. Ол жастайынан оқу орнын бітірген соң нан комбинатына жұмысқа орналасқан. Алғашында Ақтөбе қаласының Жилгорождок аумағындағы нан комбинатының филиалында жұмыс жасаған. Кейін осы орталық зауытқа ауысқан. Қазірде нанды дайындап, қалыпқа салып тұрады. Өзінің айтуынша жұмысы өзіне ерекше ұнайды. «Ас атасы-нан» деп дана халқымыз айтқан тәлімді берік ұстанады. Ол серіктестікте нан-бөлке шығаратын цехта жұмыс жасайды.
«Ауысымда он шақты адам бармыз, ұжымымыз тату, ауызбірлігіміз бар,сыйластығымыз түзу. Жұмысқа келгенді көтеріңкі көңіл күймен келесін. Өз жұмысымды жақсы көремін. Әр жұмыстың өз қиындығы, өз жауапкершілігі бар. Жұмыстың ауыртпалығынан қорықпау керек. Ерінбей,уақытпен санаспай,еңбек ету керек деп ойлаймын»,- деп өз ойын айтты тәжірибелі наубайшы ана.
Ол ауылшаруашылығы қызметкерлерінің салалық кәсіптік одағы Ақтөбе филиалының ұйымына мүше. Өткен жылы ауыл шаруашылығы еңбекерлерінің кәсіби меркесі қарсаңында Салалық кәсіподақтың алғыс хатымен марапатталған.
«Жастарға айтары-ерінбей еңбек етіп, адал нан табу. Мемлекет басшысының Жұмысшы мамандықтар жылы деп жариялауының үлкен мәні бар деп ойлайцмын. Жұмысшы мамандықтарды дәріптеп,насихаттау керек. Қазір жастар көбінесе бізге келіп, жалақы жақсарғасын,тұрақтап жатыр. Ол да жақсы. 39 жыл ішінде өз саламның маманы болдым, өмірімде осы мамандығымсыз елестете алмаймын. Ана ретінде, тәжірибелі маман ретінде тағы бір айтарым- қазір нанды қадірлемейтіндер, көбінесе қоқыс жәшігінің қасына жерге қойып кететін де адамдар бар. Нан үлкен маңдай термен,тынымсыз еңбекпен келеді. Сондықтан,наның қадірін отбасында балаларымызға айтып отыруымыз керек. Наның қадірін қоғамда насихаттау керек деп ойлаймын », деді маман.
«Ақтөбе-нан» ЖШС бүгінгі күні нан-бөлке, макарон және кондитер өнімдерін шығарады. Кәсіпорын қала нарығын тәулігіне 10 тоннадан астам нан-бөлке және 3 тоннадан астам басқа өнімдерімен қамтамасыз етіп отыр. Нан комбинаты өнімдерінің ассортиментін жыл сайын ұлғайтып келеді. Қазір комбинат өнімдерінің түрлері 60-тан асады.
Нан комбинатында 150-дей адам еңбек етеді. Оларда біздің салалық кәсіподаққа қарасты бастауыш ұйым жұмыс жасайды. Кәсіпорында жұмысшылардың әлеуметтік қорғалуы мәселесіне ерекше ден қойылып отыр. Жұмысшылардың жұмыс кезінде тамақтануы үшін тегін асхана бар. Кәсіпорын мен жұмысшылар арасында ұжымдық шарт жасалған.