Облысымыздың әлеуметтік- экономикалық жағдайын жақсартып, мәдени- рухани көркейту жолында ауыл тұрғындарын өнерге қанықтыру, игі дәстүрді жалғастыру жолында үлкен үлес қосып келе жатқан Новобаженово ауылдық клубының директоры Хасим Алия 1979 жылы Монголия Республикасы, Баян-Өлгей қаласында дүниеге келген. Шәкәрім атындағы Семей мемлекеттік университетінің «Қазақ тілі және әдебиеті» мамандығын бітірген жоғары білімді Алия 2008 жылы Новобаженово ауылдық клубына әдіскер болып тағайындалып, бүгінгі таңда директор қызметін атқаруда.
Әрбір халықтың дүниетанымы, рухани байлығы, тұрмыс-тіршілігі, әдет-ғұрпы, салт-дәстүрі мәдениеттің асыл ұғымымен астасып жатқандықтан, Алия да ұжымның басын қосып, оларға әдістемелік бағыт- бағдар беріп қана қоймай, өзі де «Мұрагер» қолөнер үйірмесін ашып, осы уақытқа дейін осы үйірме жұмысын жандандырып келеді.
Ол қызмет барысында өте талапшыл, әр бастаған істі соңына дейін жеткізетін, үжым мүшелерінен де соны талап ететін және креативті бағыттарды, жаңа идеяларды үнемі жұмыс барысында қолданып, мәдени іс-шараларды жоғары деңгейде өткізуге ат салысып, ауыл тұрғындарының қошеметіне бөленген маман.
Мемлекет басшысы Қасым-Жомарт Кемелұлы Тоқаев: «Елімізде еңбекқор адам, кәсіби маман ең сыйлы адамдар болуы тиіс», – деп атап өткен болатын. Еңбек адамдарының мәртебесін көтеру, олардың жұмысын насихаттау – «Маңдай тер» жобасының негізгі мақсаты болғандықтан, Алия 2023 жылы мамыр айында Хабар телеарнасының шақыртуымен «Маңдай тер» бағдарламасына барып, өз мамандығының ерекшеліктерін, жұмыстағы жетістіктерін, қиындықтары мен қызықты сәттерін ортаға салып, сыр шертті. 2024 жылдың мамыр айында Астана қаласында өткен Халықаралық көпжанрлы «AIASH STAR» байқауына ауылдың жас бишілерін апарып Бас жүлде жеңіп алып, Туркия елінде 2025 жылдың наурыз айында өтетін Халықаралық байқауға жолдама алды.
Әрбір елдің мәдениеті пен өнері – қоғам дамуының негізгі қажетті саласы болса, мәдениетті мықты дамыса, ол мемлекеттің тұғыры биік және керегесі кең болады. Сонымен қатар, мәдениет – адамның өз тұлғалық деңгейіне көтеретін негізгі құралы десек, осы орайда Алия мәдени іс-шараларды жоғары деңгейде ұйымдастырып қана қоймай, әртүрлі байқауларға қатысып, үлкен жетістіктерге өзі де, шәкірттері де жетіп, халықаралық, республикалық өнер байқауларында бас жүлделерге ие болып, көптеген мадақтама, алғыс хаттар және дипломдармен марапатталды. 2024 жылы Кәсіподақтар күніне орай Хаким Алия Абай облысының кәсіподақтар орталығының Құрмет грамотасымен, биыл Мәдениет және ақпарат министрлігінің «Мәдениет саласының үздігі» төсбелгісімен марапатталды. Мемлекеттік марапатты аудан әкімі Алмас Тастанбеков және Ауыл партиясының Абай облыстық филиалының өкілі Серік Болатбекұлы табыстады.
Өмірде қарапайым, моральдық жағынан ұстамды. Ауылда ұйымдастырылатын қайырымдылық, саяси және әлеуметтік-мәдени шараларына өзі және жанұясы үлес қосып отырады.
Өнегелі отбасының ұйытқысы, асыл жар, 3 баланың ардақты анасы Алияға зор денсаулық, басына амандық, жұмысына шығармашылық табыс тілейміз.