2023 жылғы 28 желтоқсандағы Қазақстан Республикасының Президенті Қасым-Жомарт Тоқаевтың Жарлығымен «Қазақстан Республикасының әкімшілік-аумақтық құрылысы туралы» Қазақстан Республикасы Заңының 9-бабына сәйкес Абай облысының құрамында жаңа әкімшілік бірліктер ретінде Мақаншы ауданы мен Жаңасемей ауданы құрылды. Бұл өзгеріс облыстың әлеуметтік-экономикалық дамуына жаңа серпін беріп, тұрғындардың өмір сапасын арттыруға бағытталған бірқатар шараларды жүзеге асыруға мүмкіндік береді.
Ағымдағы жылдың ақпан айында «Қазақстандық салалық мәдениет, спорт, туризм және ақпарат қызметкерлерінің кәсіподағы» ҚБ Абай облыстық филиалына Мақаншы ауданының Мәдениет, тілдерді дамыту және дене шынықтыру спорт бөлімінің Мақаншы ауданы «Мәдениет үйі» КММ мен «Мақаншы ауданы әкімдігінің орталық кітапханасы» КММ өкілдері Садвакасова Арай мен Казембекова Кайнижамал келіп, өз ұйымдарында бастауыш кәсіподақ ұйымын құру бойынша жалпы жиналыс өткенін және филиал құрамына кіруге дайын екендіктерін жеткізді. Бұл қадам ауданның мәдениет және ақпарат саласындағы қызметкерлердің құқықтарын қорғау мен әлеуметтік мәселелерін шешуге үлкен ықпал етеді.
Абай облыстық филиалының төрағасы Гүлнар Оразбекова мен Абай облыстық кәсіподақтар орталығының заңгері Ержан Разбеков олардың дайындап әкелген құжаттарын мұқият тексеріп, еңбек инспекциясына беретін ілеспе хаттың мазмұнын құрастыруда құқықтық кеңестер берді. Олар кәсіподақтың заңды түрде тіркелуін қамтамасыз ету үшін барлық қажетті құжаттарды жүйелі түрде тексеріп, бекітті.
Кездесудің соңында Абай облыстық филиалының қатарына қосылған Мақаншы ауданында жаңа құрылған екі бастауыш кәсіподақ ұйымына алдағы жұмыстары үшін сәттілік тіленіп, болашақта бірлесіп атқаратын іс-шаралар мен жобаларға қатысты жоспарлар талқыланды. Мақаншы ауданының мәдениет қызметкерлері кәсіподақ арқылы өздеріне қажетті қолдауды ала отырып, кәсіби біліктілігін арттыруға және мәдениет саласында сапалы өзгерістерге қол жеткізуге мүмкіндік алады.