31 наурыз күні Қазақстандық салалық білім және ғылым қызметкерлері кәсіподағының Түркістан облыстық ұйымының бастауыш кәсіподақ төрағасы Бахтияр Абдураимов Түркістан қаласы білім бөліміне қарасты Хамза атындағы №2 жалпы білім беретін мектеп ұжымымен кездесті. Іс-шара барысында кәсіподақтың негізгі қызмет бағыттары мен ағымдағы жұмыс нәтижелері талқыланды.
Бахтияр мырза кәсіподақтың басты мақсаты – білім беру саласындағы қызметкерлердің құқықтары мен мүдделерін қорғау, еңбек жағдайларын жақсарту және ұжымдар арасындағы ынтымақтастықты нығайту екенін атап өтті. Сондай-ақ, заманауи білім беру жүйесіндегі өзгерістер, инновациялар және кәсіби біліктілікті арттыру мәселелеріне ерекше назар аударды.
Кездесу барысында төраға мектеп ұжымының еңбегі мен жетістіктерін атап өтіп, алдағы кезеңде жүзеге асырылатын жобалар мен іс-шаралар туралы жоспарларымен бөлісті. Ұжым мүшелері көкейінде жүрген сұрақтарын қойып, нақты әрі мазмұнды жауаптар алды. Бұл өз кезегінде кәсіподақтың мектеп жүйесіндегі белсенді және нәтижелі қызметіне деген сенімділікті арттырды.
Мектеп директоры Дилбар Абдуразакқызы Дийметова кәсіподақ жұмысының маңыздылығын ерекше атап өтіп, бұл бағыттағы ынтымақтастықтың тиімділігін жоғары бағалады.
Сонымен қатар, іс-шара аясында мұғалімдердің аттестациялау процесі бойынша түсіндірме жұмыстары жүргізілді. Бахтияр мырза аттестацияның мәні, әдістері мен бағалау критерийлері туралы толық ақпарат беріп, педагогтердің кәсіби дамуын қолдау қажеттілігіне тоқталды.
Бұл кездесу Қазақстандық салалық білім және ғылым қызметкерлері кәсіподағының Түркістан облыстық ұйымының білім беру саласындағы бірлескен жұмысының тиімділігін тағы бір мәрте дәлелдеп, қызметкерлердің кәсіби дамуы мен құқықтарын қорғау бағытында маңызды қадам болды.