Қазақстан Республикасы Кәсіподақтар федерациясы (ҚРКФ) төрағасының орынбасары Гүлнар Жұмагелдиева бастаған делегация «Кәсіподақ десанты» акциясы аясында Батыс Қазақстан облысының энергетика саласындағы еңбек қауіпсіздігін қамтамасыз етуге арналған семинар-кеңеске қатысты. Кәсіпорындардың әлеуметтік әріптестерімен кездесу «Батыс Қазақстан ЭЖТК» ЖШС алаңында өтті. Іс-шараға Батыс Қазақстан облысы бойынша Мемлекеттік еңбек инспекциясы комитетінің департаменті, сондай-ақ «Батыс Қазақстан ЭЖТК» ЖШС, «Жайықжылуэнерго» АҚ, «Зенит» Орал зауыты» АҚ салалық және жергілікті кәсіподақ ұйымдарының басшылары мен мамандары қатысты.
Семинар-кеңесті ашқан БҚО Кәсіподақ орталығының төрайымы Айгүл Есекенова өңірдің энергетика саласында өндірістік жарақаттану деңгейінің төмендемей отырғанын атап өтті. Оның айтуынша, 2023-2024 жылдары «Батыс Қазақстан ЭЖТК» ЖШС-де 10 жазатайым оқиға орын алып, 2 адам қаза тапқан.
БҚО Еңбек инспекциясы жөніндегі басқарма басшысының орынбасары Арман Түйгінбетов өз баяндамасында бұл оқиғалардың негізгі себептерін атап өтті. Оның ішінде: қауіпсіздік жүйесіне жеткіліксіз қаржы бөлінуі, жұмысшылардың еңбек қауіпсіздігі және еңбекті қорғау бойынша жеткілікті білімнің болмауы, ескірген жабдықтамен жұмыс істеу, жұмыс беруші тарапынан қауіпсіздік шараларын бақылаудың төмендігі.
Өз кезегінде «Батыс Қазақстан ЭЖТК» ЖШС еңбекті қорғау және қауіпсіздік техникасы қызметінің басшысы Сейіт Масалимов кәсіпорында қауіпсіз еңбек жағдайларын жасау үшін қабылданып жатқан шаралар туралы айтып, бірқатар ұсыныстарын жеткізді.
«Жұмыс орындарына электрондық қолжетімділік процесін енгізу, нормативтік-құқықтық актілерді қайта қарау, сондай-ақ жұмыс процесінің заманауи бейнебақылау жүйелерін пайдалану қажет», – деді Сейіт Масалимов.
Энергетика кәсіпорындарының өкілдері саладағы төмен жалақы деңгейі де маңызды мәселе екенін атап өтті. Жалақының аздығынан білікті мамандар басқа кәсіпорындарға кетіп, олардың орнын біліктілігі төмен жұмысшылар басып жатыр.
Әлеуметтік әріптестердің пікірін тыңдаған ҚРКФ төрағасының орынбасары Гүлнар Жұмагелдиева кәсіпорындар мен мемлекеттік органдарға 2030 жылға дейінгі Қауіпсіз еңбек тұжырымдамасын іске асыру қажеттігін еске салды.
«Бұл тұжырымдамаға сәйкес, кәсіпорындардағы қауіпсіздік жүйесін өтемақылық басқарудан тәуекелге бағытталған басқаруға көшіру қажет. Құжатта өндірістік жарақаттанудың алдын алу шаралары мен әдістері нақты көрсетілген. Оларды жүзеге асыру үшін жауапкершілік жұмыс берушілерге, мемлекеттік органдарға және кәсіподақтарға жүктеледі. Біз ҚР Еңбек министрлігімен бірге жұмыс орнындағы кәсіптік тәуекелдерді жеке бағалау механизмін енгізу мәселесін талқылап жатырмыз. Бұл бағалауды арнайы зертханалар жүргізуі керек», – деді Гүлнар Жұмагелдиева.
Оның пікірінше, Қауіпсіз еңбек тұжырымдамасын іске асыру аясында кәсіпорындардағы техникалық инспекторлардың рөлін күшейту және өндірістік кеңестердің жұмысын жандандыру қажет.
«Энергетика саласындағы мәселелерге келсек, Кәсіподақтар федерациясы бұл саладағы күрделі мәселелерді шешу үшін үкіметтегі әлеуметтік әріптестерге ұсыныстар пакетін әзірлеп жатыр», – деп атап өтті ҚРКФ төрағасының орынбасары.
Сапар барысында ҚРКФ делегациясы «Батыс Қазақстан ЭЖТК» ЖШС -нің орталық диспетчерлік қызметінің жұмысымен танысты. Бұл бөлім өңірлік электр желілері компаниясының негізгі құрылымдық бөлімі болып табылады.
Кәсіпорынның бас директоры Рүстем Майранов бұған дейін кәсіпорынның кәсіподақ ұйымын басқарғанын атап өтті. Оның айтуынша, «Батыс Қазақстан ЭЖТК» ЖШС құрамында 16 аудандық электр желілері мен қалалық бөлімше бар. Ал 1867 штаттық қызметкердің 1188-і кәсіподақ мүшелері.
Кәсіпорын басшысы өндірістегі жазатайым оқиғалардың алдын алу шараларын күшейту үшін бар күшін салатынын мәлімдеді.
ҚР Кәсіподақтар федерациясының медиа орталығы