Сейсенбі, 1 сәуір күні, Қазақстандағы кәсіподақ қозғалысының 120 жылдығы мен Жұмысшы мамандықтар жылына арналған «Кәсіподақ десанты» акциясы аясында Қазақстан Республикасы Кәсіподақтар федерациясы (ҚРКФ) төрағасының орынбасары Гүлнар Жұмагелдиева бастаған делегация Батыс Қазақстан облысына сапармен барды.
Орал қаласындағы Достық үйінде облыстың кәсіподақ белсенділерімен кездесу өтті.
Гүлнар Жұмагелдиева Кәсіподақтар федерациясының мүшелік ұйымдарының басым бағыттарына тоқталды. Ол кәсіподақтардың басты назарында қауіпсіз және лайықты еңбек жағдайларын қамтамасыз ету, әлеуметтік-экономикалық құқықтарды қорғау жүйесін жетілдіру және жалпы еңбек ұжымдарындағы әлеуметтік тұрақтылықты сақтау мәселелері тұрғанын атап өтті.
«Өткен жылы 2024–2026 жылдарға арналған Бас келісімге қол қойылып, 10 салалық және 20 өңірлік келісім жасалды. Бұл құжаттар кәсіподақтардың жұмыс берушілер және мемлекеттік органдармен конструктивті ынтымақтастықтың негізіне айналды. Әлеуметтік әріптестік институты – әлеуметтік-еңбек саласындағы мәселелерді шешудің басты алаңы», – деді Гүлнар Жұмагелдиева.
Сондай-ақ ол Республикалық үшжақты комиссия отырыстарында еңбек дауларының алдын алу және оларды шешу мәселелері қарастырылатынын, ірі кәсіпорын басшылары еңбек жағдайларын жақсарту шаралары бойынша есеп беретінін еске салды.
ҚРКФ төраға орынбасары Батыс Қазақстан облысының кәсіподақ жетекшілерін әлеуметтік әріптестермен өзара әрекеттестіктің даму қарқынын тұрақты бақылауда ұстауға шақырды.
«Кәсіподақтар федерациясы өңірлік үшжақты комиссияларда облыс әкімдерімен бірге тең төрағалық етуге қол жеткізді. Бұл алаңды еңбек ұжымдарындағы өзекті мәселелерді жедел шешу үшін белсенді пайдалану қажет. Сонымен қатар, біз «Еңбек консультациялары» жобасын енгізіп жатырмыз. Бұл жұмыс берушілер мен кәсіподақтардың екіжақты кеңестері мен ақпарат алмасуын көздейді. Бір жағынан, жұмыс беруші кәсіподақтарға өндірісті басқару туралы ақпарат береді, ал екінші жағынан, кәсіподақтар еңбек жағдайларына қатысты мәліметтерді ұсынады. Ортақ консультациялар жүйесі еңбек жанжалдарын азайтуға және тараптар арасындағы ұзаққа созылған қарама-қайшылықтарды жоюға көмектеседі», – деп атап өтті Гүлнар Жұмагелдиева.
Кездесу барысында салалық кәсіподақ филиалдарының басшылары кәсіподақтық қауымдастықтың барлық деңгейінде – бастауыш ұйымдардан бастап ҚРКФ аппаратына дейінгі тікелей диалогтың маңыздылығын атап өтті.
«Кәсіподақтар федерациясының бастамалары мен әлеуметтік әріптестермен республикалық деңгейде жүргізіліп жатқан жұмысы туралы өзекті ақпарат алу – өңірлердегі әлеуметтік-еңбек қатынастарының дамуына серпін береді», – деді Батыс Қазақстан кәсіподақ белсенділері.
Қазіргі таңда Батыс Қазақстан облыстық кәсіподақтар орталығы 10 салалық, 14 жергілікті және 1109 бастауыш кәсіподақ ұйымдарын біріктіріп, 72 мың кәсіподақ мүшесін қамтиды. 2024 жылы 13 жаңа бастапқы кәсіподақ ұйымы құрылып, кәсіподақ қатары 374 жаңа мүшемен толықты.
Кездесу барысында өңірлік кәсіпорындардың бірқатар қызметкерлеріне ҚРКФ марапаттарымен марапатталды. «Кәсіподақтағы белсенді қызметі үшін» медалі «ҚПО б.в.» компаниясының кәсіподақ жетекшісі Марс Хайруллинге табысталды. Ал тарих мұрасын дамытуға қосқан көп жылдық еңбегі үшін «Еңбек озаты» медалі археолог-зерттеуші Яна Лукпанова мен аймақтың басқа да өкілдеріне берілді.
ҚРКФ-ның «Кәсіподақ десанты» акциясы бұған дейін еліміздің бірнеше өңірінде өткізілген. Акцияның мақсаты – өңірлердегі әлеуметтік-еңбек қатынастарының дамуымен танысу, еңбек ұжымдарымен кездесулер өткізу және кәсіподақтық қауымдастықтың басым міндеттері бойынша ақпараттық-түсіндіру жұмыстарын жүргізу.
ҚР Кәсіподақтар федерациясының медиа орталығы