Дүйсенбі, 31 наурыз күні Қазақстандағы кәсіподақ қозғалысының 120 жылдығына және Жұмысшы мамандықтары жылына орай ұйымдастырылған «Кәсіподақ десанты» акциясы аясында Қазақстан Республикасының Кәсіподақтар федерациясы (ҚРКФ) төрағасының орынбасары Гүлнар Жұмагелдиева бастаған делегация Ақтөбе облысына келді. Акцияның мақсаты – өңірдегі әлеуметтік-еңбек қатынастарының дамуымен танысу, еңбек ұжымдарымен кездесу және кәсіподақ қауымдастығының басым міндеттері бойынша ақпараттық-түсіндіру жұмыстарын жүргізу.
Алғашқы кездесу Aqtobe IT Hub алаңында кәсіподақ белсенділерімен өтті.
Aqtobe IT Hub – үкіметтің, жергілікті биліктің және демеушілердің қолдауымен құрылған алаң. Оның басты мақсаты – стартаптарды, IT-компанияларды біріктіру, шығармашыл және бастамашыл жастарды қолдау, жаңа технологиялық компаниялар құратын адамдарды өңірге тарту, сондай-ақ білім беру және бизнес-инкубациялық бағдарламаларды дамыту.
Кездесуде ҚРКФ төрағасының орынбасары Гүлнар Жұмагелдиева Кәсіподақтар федерациясының негізгі бағыттары туралы айтты. Оның айтуынша, кәсіподақ ұйымдарының басты басымдықтары – үшжақты әріптестікті және әлеуметтік диалогты нығайту, қызметкерлердің еңбек және әлеуметтік-экономикалық құқықтары мен мүдделерін қорғау жүйесін жетілдіру, сондай-ақ еңбек қауіпсіздігі мен еңбекті қорғау, еңбек дауларын алдын алу және шешу мәселелерін реттеу.
ҚРКФ төрағасының орынбасары мұндай кездесулер елдің барлық өңірлерінде өтетінін атап өтті.
«Кәсіподақ белсенділерімен кездесулер, кәсіподақ мүшелерінен келіп түскен сұраныстар еңбек қатынастарының әрі қарай дамуына қатысты заңнамалық актілерге нақты ұсыныстар әзірлеуге мүмкіндік береді. Кәсіподақтар федерациясы әлеуметтік серіктестерімен бірлесіп, жұмысшылардың әл-ауқатын жақсартудың қосымша шараларын қарастыруда, оның ішінде кәсіподақ мүшелерінің нақты сұраныстарына негізделген ұсыныстар да бар», – деді Гүлнар Жұмагелдиева.
Алдағы міндеттерге тоқталған Гүлнар Жұмагелдиева Жұмысшы мамандықтары жылында кәсіподақтардың әлеуметтік серіктестермен бірге әрбір Еңбек адамы үшін қолайлы жағдай жасауға айтарлықтай ықпал етуі тиіс екенін айтты.
«Біз еңбекақы мәселелеріне ерекше назар аударамыз. Өткен жылы ҚРКФ бастамасымен ең төменгі жалақы мөлшерін анықтау әдістемесі әзірленіп, қабылданды. Кәсіподақтардың тұрақты талап етуінің арқасында ең төменгі жалақы мөлшері туралы Халықаралық еңбек ұйымының №131 конвенциясын ратификациялау үкіметтің жоспарына енгізілді. Сондай-ақ біз жалақыны міндетті түрде жыл сайын индексациялауды заңнамалық тұрғыда бекітуді көздеп отырмыз», – деді ҚРКФ төрағасының орынбасары.
Кездесу барысында салалық, жергілікті және бастапқы кәсіподақ ұйымдарының филиал басшылары өнеркәсіптік кәсіпорындарда жұмыс орындарын аттестаттау және саралау мәселелеріне ерекше тоқталды.
Әріптестерінің сұрақтарына жауап бере отырып, Гүлнар Жұмагелдиева бұл мәселелердің 2030 жылға дейінгі Қауіпсіз еңбек тұжырымдамасын жүзеге асыру аясында әлеуметтік серіктестермен бірлесіп қарастырылып жатқанын айтты.
Кездесу соңында өңірдегі кәсіпорындардың бірқатар қызметкерлері мен кәсіподақ белсенділері «Кәсіподақтардағы белсенді жұмысы үшін» медалімен және Қазақстан Республикасы Кәсіподақтар федерациясының Құрмет грамотасымен марапатталды. «Кәсіподақ десанты» акциясы аясында Ақтөбе облысында еңбек ұжымдарымен кездесулер өткізіліп, еңбек және кәсіподақ заңнамасын қолдану тәжірибесі бойынша семинарлар ұйымдастырылады.
ҚР Кәсіподақтар федерациясының медиа орталығы