Қазақстан Республикасы Кәсіподақтар федерациясының (ҚРКФ) төрағасының орынбасары Гүлнар Жұмагелдиева бастаған делегация «Кәсіподақ десанты» акциясы аясында Батыс Қазақстан облысында Жұмысшы мамандықтар жылы аясында кәсіби білім беру саласындағы міндеттердің жүзеге асырылу барысымен танысты. Делегация Орал қаласындағы Жоғары аграрлық-техникалық колледжіне барып, оқу орнының жұмысымен танысты.
Биыл Жоғары аграрлық-техникалық колледж өзінің 92 жылдық мерейтойын атап өтуде. Бұл оқу орны – аймақтағы жетекші білім беру мекемелерінің бірі. Колледж 13 мамандық бойынша кәсіби-техникалық білім берумен қатар, «Ғимараттар мен құрылыстарды салу және пайдалану» мамандығы бойынша «Қолданбалы бакалавр» бағдарламасын да ұсынады. Әр мамандық бойынша студенттерге негізгі біліктіліктермен қатар, жұмысшы мамандықтарын игеру мүмкіндігі де қарастырылған. Мысалы, «ғимараттар мен құрылыстарды салу және пайдалану» мамандығында оқитын студент құрылыс технигі дипломын алып қана қоймай, «құрылыс-әрлеу жұмыстары шебері», «жалпы құрылыс жұмыстарының шебері» біліктіліктерін де меңгере алады. Колледж он жылдан астам уақыт бойы дуалды оқыту жүйесі аясында 7 мамандық бойынша мамандар даярлап келеді. Ал бес жыл бұрын мұнда «Жас маман» жобасы іске қосылып, жаңа мамандықтар бойынша даярлау басталды. Олар: «электрмен жабдықтау», «автомобиль көлігіне қызмет көрсету, жөндеу және пайдалану», «мұнай-газ құбырлары мен қоймаларын салу және пайдалану», «мұнай-газ кен орындарын игеру».
Оқу орны директорының міндетін атқарушы Әсел Ғалиасқарованың айтуынша, 2021 жылдың шілде айында колледж институционалдық аккредитациядан сәтті өтіп, 13 мамандық бойынша Қазақстандық білім сапасын қамтамасыз ету жөніндегі тәуелсіз агенттіктің сертификатын алған. 2023 жылы колледж мемлекеттік аттестациядан, ал 2024 жылы «Электромонтаж» жұмысшы біліктілігі бойынша халықаралық аккредитациядан өтті.
«Біз еңбек нарығының сұранысын ескереміз. Оқу процесіне озық технологияларды енгізуге тырысамыз, кейбір мамандықтар бойынша 5D модельдеу бағдарламаларын пайдаланамыз. Оқытушыларымызды бағдарламалық қамтамасыз етуді қолдануға үйреттік. Қазіргі таңда колледжде 1200 студент білім алуда. Біздің түлектерге сұраныс өте жоғары. Жыл сайын бітірушілердің 90%-ға жуығы жұмыспен қамтылады», – деді Әсел Ғалиасқарова.
Оқу орнының білім беру бағдарламасымен және оқу-өндірістік шеберханаларымен танысқан ҚРКФ төрағасының орынбасары Гүлнар Жұмагелдиева білім беру мекемелері мен өңір кәсіпорындары арасындағы әріптестік қатынастарды одан әрі дамыту қажеттігін атап өтті.
«Жұмысшы мамандықтары жылы аясында мемлекет жұмысшы мамандықтар бойынша жоғары білікті мамандар даярлауға ерекше назар аударып отыр. Еңбек нарығындағы сұраныс пен ұсыныстың сәйкестігі оқу орындары мен кәсіпорындар үшін өзара тиімді. Жоғары аграрлық-техникалық колледж түлектерінің жұмысқа орналасу деңгейінің жоғары болуы оқу үдерісіндегі мақсатты жұмыстың мысалы болмақ», – деді Гүлнар Жұмагелдиева.
2015 жылдан бері колледжде бастауыш кәсіподақ ұйымы жұмыс істейді, оның құрамына 148 оқытушы кіреді. Бастауыш кәсіподақ ұйымының төрайымы Айнұр Қайралиева 2025-2028 жылдарға арналған жаңа ұжымдық келісімшартқа енгізілген әлеуметтік кепілдіктер туралы айтты.
Кездесу соңында ҚРКФ төрағасының орынбасары колледж ұжымына әлеуметтік әріптестікті дамытудағы табысты жұмыстары үшін алғыс білдірді. Ал бастауыш кәсіподақ ұйымының төрайымы Айнұр Қайралиева ҚРКФ-ның «Кәсіподақтардағы белсенді қызметі үшін» медалімен марапатталды.
ҚР Кәсіподақтар федерациясының медиаорталығы