ҚР Кәсіподақтар федерациясының «Кәсіподақ десанты» республикалық жобасы аясында Батыс Қазақстан облысының кәсіподақ белсенділеріне арналған «Еңбек дауларын басқару. Еңбек дауларын шешудің құқықтық аспектілері, кәсіподақтардың рөлі мен функциясы» тақырыбында оқыту семинар-тренингі өтті.
ҚР Кәсіподақтар федерациясының Оқу орталығының директоры Ляззат Есжанова кәсіподақ өкілдеріне арналған оқыту семинарлары кәсіподақ құрылымын нығайту және кәсіподақ қызметкерлерінің біліктілігін арттыру бағытындағы ҚРКФ-ның негізгі қызметтерінің бірі екенін атап өтті.
Тренинг барысында спикер кәсіподақ белсенділерінің күнделікті жұмысында еңбек және кәсіподақ заңнамасын қолдану тәжірибесі бойынша егжей-тегжейлі түсініктеме берді. Ляззат Есжанова кәсіподақтардың әлеуметтік әділеттілікті қамтамасыз етудегі маңызды рөлін ерекше атап өтті.
«Кәсіподақтардың басты міндеті – еңбек қатынастары саласындағы әлеуметтік әділеттілікті қамтамасыз ету, мұнда негізгі фактор – Еңбек адамының құқықтары мен мүдделерін қорғау. Әрбір кәсіподақ жетекшісі өз кәсіпорнындағы жағдайды білуі тиіс, ал біздің семинарлар осы үшін қажетті дағдыларды қалыптастырып, еңбек және кәсіподақ заңнамасы бойынша білім қорын толықтырады», – деді ҚРКФ Оқу орталығының директоры.
Семинар барысында Ляззат Есжанова ҚР заңнамасына негізделген еңбек дауларын шешу алгоритмін ұсынып, дауларды қарау тәртібін, оның ішінде өтініштерді қабылдау және қарау мерзімдерін, татуластыру комиссиясы мен еңбек арбитражының жұмыс кезеңдерін, сондай-ақ сот талқылауының тәртібін егжей-тегжейлі сипаттады.
Семинар қатысушылары өз ұсыныстарын ортаға салып, өзекті кейстер бойынша белсенді жұмыс жүргізді.
Семинар сұрақ-жауап сессиясымен және кәсіподақтардың күнделікті қызметінде жиі кездесетін нақты жағдайларды талдаумен аяқталды. Спикер қатысушыларға кәсіподақ тәжірибесінде кездесетін мәселелер бойынша түсіндірме беріп, практикалық көмек көрсетті.
Айта кетейік, ҚР Кәсіподақтар федерациясының «Кәсіподақ десанты» акциясы Жұмысшы мамандықтар жылына, Қазақстандағы кәсіподақ қозғалысының 120 жылдығына және Қазақстан Республикасы Кәсіподақтар федерациясының 35 жылдығына арналған. Бұл акция еліміздің барлық өңірлерінде биылғы жылдың қаңтар айынан бастап өткізіліп келеді. Алдағы уақытта елдің оңтүстік және шығыс өңірлерінде еңбек ұжымдарымен кездесулер, әлеуметтік әріптестермен кездесулер және оқыту семинарлары ұйымдастырылатын болады.
ҚР Кәсіподақтар федерациясының медиаорталығы