Дүниежүзілік денсаулық сақтау күні аясында «SENIM» денсаулық сақтау жүйесі қызметкерлері кәсіподағының Астана қалалық филиалы ұйымдастырған бильярдтан турнир өткізілді. Оған Астана қаласындағы 10 ұйымның атынан 25 адам қатысты.
Шараның ашылу салтанатында «SENIM» денсаулық сақтау жүйесі қызметкерлері кәсіподағының Астана қалалық филиалының төрайымы Гүлмира Мұстафаева сөз сөйлеп, барлық қатысушыларға сәттілік тілей отырып, денсаулық сақтау саласы қызметкерлерінің кәсіби тұрғыда да, әлеуметтік өмірде де белсенділігі мен ұйымшылдығын арттырудың маңыздылығына тоқталды. Сонымен қатар, ол мұндай іс-шаралардың қызметкерлер арасындағы байланысты нығайтып, әріптестер арасында достық пен қолдау атмосферасын қалыптастыруға зор үлес қосатынын атап өтті.
Турнирдің қорытындысы бойынша жеңімпаздар арасында қызу бәсеке орын алды. Үшінші орынды № 3 қалалық емханасының білікті қызметкері Ертөлеу Шәріпханов иеленді. Екінші орын № 9 қалалық емханасының тәжірибелі қызметкері Нұрхан Картаевқа бұйырды. Ал, турнирдің ең басты жеңімпазы, яғни бірінші орын Көп салалы медициналық орталықтың ең мықты ойыншысы Қалымжан Мұсабековке табыс етілді. Қалымжан өзінің керемет шеберлігімен, дәлдігімен және ойынға деген үлкен ынтасы мен жауапкершілігімен ерекшеленіп, барлық қатысушыларды таңқалдырды.
Сонымен қатар, бильярд турнирі барысында ынталандыру жүлдесімен Марал Калжанов пен Мейрамхан Қайранбаев марапатталып, оларға арнайы грамоталар табыс етілді. Олар өздерінің белсенді қатысуымен ерекше көзге түсті.
Жарыс тартысты әрі қызықты өтті, барлық қатысушылар жоғары деңгейде өнер көрсетті. Турнирдің нәтижесі жұмыстан тыс уақытта да денсаулық сақтау саласы қызметкерлері арасындағы байланыстарды нығайтуға мүмкіндік берді.