Жазғы демалыс мезгілінде Темір аудандық білім қызметкерлері кәсіподағының ұйымдастыруымен ұстаздар қауымына еліміздегі ең танымал сауықтыру орындарының бірі — Сарыағаш шипажайына барып, денсаулықтарын нығайту мүмкіндігі берілді.
Табиғи минералды суларымен, шипалы климаты және көрікті табиғатымен танымал Сарыағаш өңірі демалушылар үшін ерекше жайлылық пен емдік әсер сыйлады. Ұстаздар медициналық тексерістен өтіп, түрлі емдік-сауықтыру процедураларын қабылдады. Бұл шаралар олардың жалпы денсаулығын жақсартуға, жүйке жүйесін тынықтырып, қажыр-қайраттарын қалпына келтіруге үлкен ықпал етті.
Демалыс аясында кәсіподақ мүшелері Сарыағаштың тарихи-мәдени нысандарын аралап, өңірдің табиғи көркем жерлерімен танысты. Танымдық серуендер мен жаңа әсерлер ұстаздардың көңілін көтеріп, рухани шабыттарын арттырды.
Кәсіподақ мүшелері осындай жанға жайлы, рухани һәм физикалық демалыс ұйымдастырғаны үшін кәсіподақ ұйымына шынайы алғыстарын білдіріп, алдағы уақытта да осындай игі бастамалар жалғасын табарына сенім білдірді.
