Сіздерді кәсіби мерекелеріңіз – Құрылысшылар күнімен шын жүректен құттықтаймын!
Құрылысшы мамандығы – адамзат өркениетінің дамуына тікелей ықпал ететін, мемлекетіміздің әлеуметтік-экономикалық өсімі мен халықтың әл-ауқатына зор үлес қосатын аса маңызды сала.
Сіздердің тынымсыз еңбектеріңіздің, табандылық пен төзімділіктің арқасында еліміздің түкпір-түкпірінде заманауи тұрғын үйлер, өндірістік кешендер, мектептер мен балабақшалар, денсаулық сақтау нысандары және ірі инфрақұрылымдар бой көтеруде. Бұл – болашаққа бағытталған берік тірек, халқымыздың әл-ауқатын арттыруға арналған асыл еңбек.
Саладағы әрбір маман – инженерден бастап дәнекерлеушіге, кран жүргізушісінен бастап сәулетшіге дейінгі барлық еңбек адамдары – құрметке лайық. Сіздер жасаған әр нысан – елдің игілігі үшін қызмет етіп, ұрпақтан-ұрпаққа мұра болып қала береді.
Қазақстан Республикасының Кәсіподақтар федерациясы еңбек адамының мүддесін қорғау мен қолдауды басты міндет деп санайды. Құрылыс саласында жұмыс істейтін әрбір азаматтың еңбек құқығының қорғалуы, қауіпсіз еңбек жағдайымен қамтамасыз етілуі және лайықты жалақы алу құқығы – біз үшін аса маңызды. Осы мақсатта жүйелі жұмыстар атқарылып, әлеуметтік әріптестік аясында нақты шаралар қабылданып келеді.
Қадірлі құрылысшылар!
Сіздерге және отбасыларыңызға зор денсаулық, ұзақ ғұмыр, мол ырыс-береке, бейбіт өмір тілеймін! Жасаған әрбір еңбектеріңіз жемісті болып, кәсіби жолдарыңызда толағай табыстарға жете беріңіздер!
Құрылыс нысандарыңызда қауіпсіздік пен сәттілік серік болсын! Еңбектеріңіз еленіп, елдің алғысы мен құрметіне бөлене беріңіздер!
Ізгі тілекпен,
Қазақстан Республикасы
Кәсіподақтар федерациясының төрағасы
Сатыбалды Дәулеталин