Қазақстан Республикасы Кәсіподақтар федерациясы мен ХЕҰ/ACTRAV еңбекшілердің қызметі бюросының бірлескен іс-шаралар жоспарын іске асыру шеңберінде бұған дейін Қазақстан Республикасы Кәсіподақтар федерациясының төрағасы Сатыбалды Дәулеталин мен Еуропа және Орталық Азия секторының меңгерушісі Сергеюс Гловацкас қол қойған болатын. Қарағанды облысының кәсіподақтар үйінде «Кәсіподақтар жол айрығында. Кәсіподақтардың болашағы» атты дөңгелек үстел жұмысы өтті.
Іс-шараны ашқан Қазақстан Республикасы Кәсіподақтар федерациясы төрағасының бірінші орынбасары Мұхтар Тінікеев Кәсіподақтар федерациясының Халықаралық еңбек ұйымымен және Халықаралық кәсіподақтар конфедерациясымен өзара іс-қимылы табысты және серпінді дамып келе жатқанын атап өтті.
«Бірлескен іс-шаралар жоспарында Халықаралық еңбек ұйымының қызметкерлерді әлеуметтік қорғау және еңбек құқықтары саласындағы 17 Конвенциясын ратификациялауды ілгерілету; Қазақстанда лайықты еңбектің Ұлттық бағдарламасын қабылдау үшін кәсіподақтардан ұсыныстар әзірлеу, оқыту семинарлары, конференциялар сериясы, сондай – ақ гендерлік теңдікті ілгерілету және кәсіподақтардың жастар саясатын нығайту көзделген», – деді Мұхтар Тінікеев.
Өз кезегінде Сергеюс Гловацкас дөңгелек үстелге қатысушыларды қазіргі заманғы сын – қатерлер мен оларға ден қою жолдарын ескере отырып, ХЕҰ мен халықаралық кәсіподақ қозғалысының құрылу, қалыптасуы мен қызметінің тарихымен таныстырып, кәсіподақтардың басты міндеті-еңбек құқықтарын қорғау, әлеуметтік әділеттілік қағидаттарын ілгерілету, еңбек заңнамасын еңбекшілердің пайдасына өзгерту жөнінде ұсыныстар енгізу екенін атап өтті.
Қарағанды облысы Кәсіподақ орталығының төрағасы Болат Жұмабеков дөңгелек үстелге қатысушыларды аумақтық кәсіподақтар бірлестігінің 2023 жылғы жұмысының қорытындылары және ҚРКФ Бас кеңесінің шешімімен Лайықты еңбек жылы деп жарияланған 2024 жылға арналған жұмыскерлердің әлеуметтік-еңбек құқықтарын жетілдіру жөніндегі қызметтің негізгі бағыттары туралы хабардар етті.
Сонымен қатар, “ҚАЗУГЛЕПРОФ” салалық кәсіптік көмір өндірушілер одағының төрағасы Марат Миргаязов біздің елімізде «Шахталардағы еңбек қауіпсіздігі және гигиенасы туралы» ХЕҰ №176 конвенциясын ратификациялау қажеттілігі туралы пікір білдірді.
Кездесудің тағы бір қатысушысы, «Қарағанды облысының еркін кәсіподақтар достастығы» аумақтық кәсіподақтар бірлестігінің төрағасы Сергей Белкин кәсіподақ қозғалысының жекелеген аспектілері, өңірлік деңгейде әлеуметтік әріптестікті іске асыру, кәсіподақ активін еңбек дауларын шешуде медиация негіздеріне оқыту туралы пікірімен бөлісті.
Елімізде кәсіподақ қозғалысын дамыту перспективалары туралы тақырыпты талқылауға көмір және металлургия өнеркәсібі, темір жол көлігі, денсаулық сақтау, ағарту, ғылым және жоғары білім қызметкерлері кәсіподақтарының облыстық филиалдарының, құрылыс кешені мен ТКШ, кәсіпкерлік және кооперация, мемлекеттік органдар мен ауыл шаруашылығы, Заң клиникасы филиалының өкілдері белсенді қатысты.
Дөңгелек үстел аясында “STARTKINO” қоғамдық бірлестігінің төрағасы, Қарағанды облыстық мәслихатының депутаты Арман Әлімжанов және ағарту, ғылым және жоғары білім қызметкерлерінің Қазақстандық салалық кәсіподағының Қарағанды облыстық ұйымының өкілі,ғалым, Қарағанды облысының өлкетанушысы, Қазақстан Республикасы кәсіподақ қозғалысының тарихы бойынша сарапшы Жұмағали Мағзиев Қазақстандағы кәсіподақ қозғалысының қалыптасу тарихы мен қазіргі заманғы дамуы туралы фильм түсіру тұсаукесерімен сөз сөйледі.
Қазақстанда бірінші кәсіподақтың құрылуының 120 жылдығы қарсаңында (1905 жыл-Успен мыс кеніші, қазіргі Қарағанды облысы Шет ауданының аумағы) дөңгелек үстелге қатысушылар жастар арасында жұмысшы кәсіптерінің беделін және туған өлкенің тарихы бойынша білімдерін арттыру үшін жаңа ақпараттық – танымдық жобаның креативтілігі мен маңыздылығын атап өтті.
Іс-шара барысында Қазақстанның кәсіподақ қозғалысын дамытудағы еңбегі үшін кәсіби көшбасшылар мен белсенділерді марапаттау рәсімі өтті. Қазақстан Республикасы Кәсіподақтар Федерациясының «Еңбек озаты» медалімен теміржол, автомобиль, әуе және су көлігі қызметкерлерінің Қазақстандық салалық кәсіптік одағының Қарағанды филиалының төрағасы Яхия Алмусин марапатталды.
Халықаралық еңбек ұйымы бюросының ACTRAV еңбекшілерінің қызметі жөніндегі Құрмет грамотасымен Лайықты еңбек қағидаттарын ілгерілету ісіндегі еңбегі үшін Марат Миргаязов марапатталды.
Дөңгелек үстел соңында қатысушылар әлемдік тәжірибені ескере отырып, кәсіподақ қозғалысындағы жаңа тәсілдер туралы өткізілген сындарлы диалогтың тиімділігін атап өтті.
ҚР Кәсіподақтар федерациясының медиаорталығы