«Yntymaq» салалық кәсіподағының Қызылорда облыстық филиалы құрамындағы «Өркен Әлем» серіктестігі жұмыскерлерінің әлеуметтік-еңбек жағдайы тұрақты жақсартылуда. Кәсіпорында жұмыскерлер саны артып, олардың жұмыс орынына қатынауы үшін арнайы автобуспен тасымал ұйымдастырылған және өндіріс цехтары жанындағы асхананың ас мәзірлері құнарлы тағамдармен толықтырылған.
Өндіріс орынындағы еңбек ұжымымен кәсіподақ төрағасы Марат Бәйімбетов кездесті. Жалағаш ауданында орналасқан кәсіпорын әскери киімдер өндірумен айналысады. Бастапқыда үлкен өндіріс орны 24 адамды жұмыспен қамтыса, кейін мұнда 50-ге жуық жергілікті тұрғын жұмыс істесе, биылғы жылы жұмыскерлер саны 70-ке жетті.
Бүгінде Қазақстан бойынша арнайы әскери киім шығаратын 3 цехтың бірі болып табылатын бірегей өндіріс орынында арнайы оқудан өткен тәжірибелі мамандар жұмыс істейді. Кәсіпорын өндірісінің бірегейлігі сол, мұнда еліміз бойынша әскери салаға қажетті киімдердің барлық түрін өндіретін жалғыз кәсіпорын. Серіктестік броньді кеудеше, каскадан бөлек газтұмылдырық, қатты соққыға, жарықшаққа және оққа қарсы шлемнің бірнеше түрін шығарады.
Кәсіпорын басшысы Жақсылық Өзденбаевпен еңбек кеңестерінде жұмыскерлерге жасалған әлеуметтік еңбек жағдайлары, өндіріс орынының қазіргі жұмыс барысы, тапсырыстарды орындау, жұмыскерлердің біліктілігін арттыру, өндіріс көлемі мен жұмыскерлердің санын арттыру жоспарлары туралы әңгіме өрбіді.
«Кәсіподақтар атынан кәсіпорын басшылығының әлеуметтік жауапкершілігінің жоғарылығы мен еңбек жағдайларын жақсартудағы қолдаулары үшін ризашылық білдіреміз. Әлеуметтік әріптестіктің оң үрдістерін көрсететін өндіріс орынына шын жүректен өркендеу тілейміз. Еңбек ұжымы әл-ауқаты артып, жұмыстарыңыз нәтижелі бола берсін» деп тілек білдірді кездесуде салалық кәсіподақ төрағасы Марат Бәйімбетов.
«Өркен Әлем» серіктестігі жұмыскерлерінің бастауыш кәсіподақ ұйымы төрағасы Аманкүл Жұмаділдаева мен бірқатар кәсіподақ мүшелеріне кәсіподақтар қозғалысындағы белсенділіктері үшін алғыс білдіріліп, Қызылорда облысы аумақтық кәсіподақтар бірлестігі мен «Yntymaq» салалық кәсіподағының Қызылорда облыстық филиалының мерекелік марапаттары табысталды.
