Астанада акция барысында Кәсіподақтар федерациясының төрағасы Сатыбалды Дәулеталиннің бастауымен Қазақстан Республикасы Кәсіподақтар федерациясының аппараты елорданың орталық көшелерінің бірі – Тұран даңғылында 50 қарағаш пен тал көшетін отырғызды. Федерацияның мерейтойлық жылында ағаш отырғызу кәсіподақ қозғалысының дәстүрлі тамыры мен өсіп-өркендеуінің символына айналды.
Қазақстан Республикасы Кәсіподақтар федерациясының төрағасы Сатыбалды Дәулеталин бұл шараны кәсіподақтардың Бірлік күні деп атады.
«Бүгінгі шараға еліміздің барлық салалары мен аймақтарынан кәсіподақ мүшелері қатысуда: шахтерлер, металлургтер, дәрігерлер, мұғалімдер және өзге де еңбек адамдары. Бұл жай ғана сенбілік емес – бұл біздің болашаққа деген ұстанымымыздың көрінісі. Бұл – еліміздің рухын көтеретін үлкен іс-шара. Ол экологиялық мәдениетті қалыптастырады. Бұл – біздің бірлігіміздің, Отанымызға, ортақ шаңырағымызға деген сүйіспеншілігіміздің айғағы. Жалпы, Президентіміздің «Таза Қазақстан» бастамасын бүкіл халық қолдады. Ал кәсіподақтар үшін бұл тағы бір Бірлік күні», – деп атап өтті.
Шығыс Қазақстан облысы, Ұлан ауданы, Қасым Қайсенов кентіндегі жаңа балалар музыка мектебінің аумағына сібір шыршасының көшеттері отырғызылды. Бұл шараға ардагерлер, жастар және әлеуметтік әріптестер белсенді қатысты.
Батыс Қазақстан облысының кәсіподақ көшбасшылары мен белсенділері осы күні «Асыл Мирас» аутизмі бар балаларды қолдау орталығының аумағын көгалдандырып, бірнеше ондаған қарағай көшетін отырғызды.
Жамбыл облысында 140-тан астам кәсіподақ мүшесі арша бұталарын отырғызып, Тараз қаласындағы саябақ аумағын абаттандырды.
Павлодар облысында ҚРҚФ «Таза Қазақстан – болашақ үшін» акциясы аясында кәсіподақ өкілдері Усолка өзенінің жағасындағы саябақ пен «Ертіс» шаңғы базасында абаттандыру жұмыстарын жүргізді.
Сонымен қатар кәсіподақ акциясына тұрғындар да қосылды. Солардың бірі – елордалық зейнеткер Қобыланды Базарбаев былай деді:
«Мен бүкіл өмірімде еңбек еттім, еңбектің қадірін білемін және өз қалама, табиғатқа қамқор болудың қаншалықты маңызды екенін түсінемін. Бүгін жастардың, кәсіподақтардың және қарапайым адамдардың бірігіп ортақ игілікке жұмыс істеп жатқанын көрдім де, бей-жай қала алмадым. Бұл нағыз еңбек пен бірліктің мерекесі. Бүгінгі көңіл-күй үшін сіздерге алғыс айтамын», – деп әсерімен бөлісті.
Қазақстан Республикасы Кәсіподақтар федерациясының төрағасы Сатыбалды Дәулеталин акцияға қатысқан барлық азаматтар мен серіктестерге ортақ іске қосқан үлестері үшін алғысын білдіріп, экологиялық жауапкершілік – бір реттік шара емес, өмір салты және кәсіподақтардың әлеуметтік миссиясының маңызды бөлігі екенін атап өтті.
«Бүгінгі күн – бірлік, ынтымақ пен ортақ құндылықтардың ел болашағы үшін игі істерге шабыт бере алатынының айқын дәлелі. Біз бірге болсақ – біз күштіміз», – деп қорытындылады ол.
Еске сала кетейік, «Таза Қазақстан» – Қазақстан Президентінің өткен жылдың сәуірінде бастаған республикалық акциясы. Федерация мен оның мүшелік ұйымдары осы бастаманы алғашқы күндерден-ақ қолдап, «Таза Қазақстан – болашақ үшін» ұранымен еңбеккерлерді табиғатты аялауға, отансүйгіштік пен туған жерге деген жауапкершілікті арттыруға белсенді түрде тартып келеді.
ҚР Кәсіподақтар федерациясының медиа орталығы