Бейсенбі күні, 29 қаңтарда, Астанада Халықаралық еңбек ұйымы ұйымдастырған әлеуметтік диалог және еңбек дауларын шешу жөніндегі жоғары деңгейдегі үшжақты дөңгелек үстел аясында Қазақстан Республикасы Кәсіподақтар федерациясының төрағасы Сатыбалды Дәулеталин халықаралық әріптестермен бірқатар екіжақты кездесулер өткізді.
ХЕҰ-ның Шығыс Еуропа мен Орталық Азиядағы лайықты еңбек және техникалық қолдау тобының директоры Михаил Пушкинмен кездесу барысында халықаралық еңбек стандарттарын енгізу, ХЕҰ конвенцияларын іске асыру, еңбек инспекциясы жүйесін дамыту, кәсіподақ қызметін цифрландыру және қызметкерлердің құқықтарын қорғау бойынша ынтымақтастықтың негізгі бағыттары талқыланды.
ҚРКФ төрағасы Сатыбалды Дәулеталин ҚР Кәсіподақтар федерациясы мен Халықаралық еңбек ұйымы арасындағы сенім мен серіктестіктің жоғары деңгейін атап өтті.
«Біз ХЕҰ-мен, оның ішінде АКТРАВ бюросы арқылы ұзақ уақыт бойы әрі жүйелі түрде жұмыс істеп келеміз және нақты тәжірибелік қолдауды сезінеміз. Ең бастысы — бүгінде өзара сенім бар, біздің іс-қимылымыз дәл осы сенімге негізделген. Біз үшін қазіргі іс-шаралар — жағдайды жақсырақ түсініп қана қоймай, бірге алға жылжуға мүмкіндік беретін маңызды кезең. Біз қызметкерлерді қорғаудың ұлттық стандарттарын енгізу бойынша белсенді жұмыс істеп жатырмыз, ұжымдық келіссөздерге арналған цифрлық платформаны, кәсіподақ қозғалысы көшбасшыларына арналған білім беру бағдарламаларын дамытудамыз. Лайықты еңбектің барлық деңгейде басымдық болып қалуы маңызды», — деп атап көрсетті Қазақстан Республикасы Кәсіподақтар федерациясының төрағасы.
Келіссөздер барысында халықаралық конвенцияларды, соның ішінде №87, №131 және №176 конвенцияларды іске асыру, әсіресе өндіруші өнеркәсіптегі еңбек инспекциясын дамыту, сондай-ақ ұлттық деңгейде әлеуметтік әділдік пен лайықты еңбек қағидаларын ілгерілету мәселелеріне ерекше назар аударылды.
«Ынтымақтастығымыздың және Халықаралық еңбек ұйымының үлкен қолдауының арқасында бізде нақты нәтижелер бар. Маңызды жетістіктердің бірі — еңбек инспекциясының бейінді министрліктің қарамағына берілуі. Және, әрине, ХЕҰ-ның № 131 конвенциясының қабылдануы біз үшін өте маңызды болды. Ал № 176 конвенцияны ратификациялауға келсек, бұл мәселе әлеуметтік әріптестердің күн тәртібінде тұр», — деді Сатыбалды Дәулеталин.
ҚРКФ төрағасы Кәсіподақтар федерациясының өңірлердегі жұмысы, конституциялық реформаға қатысуы және лайықты еңбек ұғымын бекітуге бағытталған заңнамалық бастамаларды ілгерілетуі туралы айтып берді.
Сондай-ақ кәсіподақ қызметін цифрландыру және жасанды интеллектті енгізу мәселелері талқыланды.
«Біздің міндетіміз — цифрландыру мен жасанды интеллект (ЖИ) процестерінен қалып қоймай, кәсіподақтардың цифрлық экожүйесін құру және оған лайықты еңбек пен әлеуметтік қорғау принциптерін енгізу. Технологиялар адамды алмастырмауы және оны дауыс беру құқығынан айырмауы керек. ҚРКФ Бас кеңесінің отырысында біз Кәсіподақтар федерациясын цифрлық трансформациялау тұжырымдамасын және 5 жылға есептелген жол картасын бекіттік. Биылғы жылды ел Президенті Цифрландыру және жасанды интеллект жылы деп жариялады. Қазақстанда «Жасанды интеллект туралы» ҚР Заңы және «Цифрлық кодекс» қабылданды. Кәсіподақтар федерациясы «ЖИ дәуіріндегі қызметкерлердің құқықтарын қорғау стандартын» әзірледі, ол Орталық Азия елдері кәсіподақтары кеңесінің деңгейінде бекітілді. Біз Мемлекет басшысының қатысуымен өткен Ұлттық құрылтай барысында өз ұстанымымызды білдіріп, Ұлттық стандартты әзірлеу туралы ұсыныс жасадық», — деді Сатыбалды Дәулеталин.
Өз кезегінде Михаил Пушкин жылы қабылдау үшін алғыс айтып, ҚРКФ-ның ХЕҰ-ның Қазақстандағы негізгі серіктесі ретіндегі маңызды рөлін атап өтті.
«Біз Қазақстан Кәсіподақтар федерациясымен қалыптасқан көпжылдық ынтымақтастық пен әріптестік қарым-қатынасты жоғары бағалаймыз. Сіздер әлеуметтік диалог пен лайықты еңбек идеяларын ұлттық және халықаралық деңгейде ілгерілетудің маңызды қатысушысысыздар. Сіздерді № 131 конвенцияның ратификациялануымен құттықтаймын. Бұл — маңызды қадам және Жол картасының маңызды шарты. Біз № 176 конвенцияны, әсіресе біздің бірлескен жобамыз бар өндіруші өнеркәсіпте енгізу бойынша қолдауды жалғастыруға дайынбыз», — деді ХЕҰ өкілдігінің басшысы.
Ол сондай-ақ ХЕҰ Бас директоры Жильбер Унгбоның 2024 жылы Қазақстанға жасаған сапарының және Жол картасына қол қоюдың маңыздылығын атап өтіп, оның міндеттерін іске асыру ХЕҰ басшылығының тұрақты назарында екенін баса айтты.
Михаил Пушкин халықаралық стандарттарды іске асыру, еңбекті қорғау, бірлесу еркіндігі және ұжымдық келіссөздер мәселелері бойынша бұдан былай да техникалық қолдау көрсетуге дайын екендігін білдірді.
Тараптар қарсаңында қол қойылған 2026 жылға арналған бірлескен іс-қимыл жоспары аясындағы жұмысты жалғастыру, лайықты еңбекке жәрдемдесу жөніндегі Жол картасын іске асыру, сондай-ақ цифрлық трансформацияны қолдау және ұжымдық келіссөздер мен кәсіподақ лидерлеріне арналған білім беру бағдарламалары үшін заманауи құралдарды енгізу бойынша міндеттемелерін растады.
Кездесу соңында Қазақстан Республикасы Кәсіподақтар федерациясының төрағасы халықаралық серіктеске кәсіподақ қозғалысын дамытуға және халықаралық ынтымақтастықты нығайтуға қосқан жеке үлесін мойындау белгісі ретінде «Кәсіподақ қозғалысына 120 жыл» Қазақстан Республикасы Кәсіподақтар федерациясының мерейтойлық медалін табыс етті.
Дөңгелек үстел аясында ҚРКФ төрағасы Сатыбалды Дәулеталин БҰҰ-ның Қазақстандағы Тұрақты үйлестірушісі Саранго Раднарагчамен де кездесу өткізді.
Әңгімелесу барысында әлеуметтік қорғау, еңбекті қорғау мәселелері бойынша ынтымақтастықты нығайту және Қазақстан еңбекшілерінің өмір сүру деңгейін арттыруға бағытталған бірлескен жобаларды іске асыру мүмкіндіктері талқыланды.
ҚР Кәсіподақтар федерациясының төрағасы ұлттық бастамалардың тиімділігін арттыру үшін бірлескен жұмыс пен тәжірибе алмасудың маңыздылығын атап өтті.
Саранго Раднарагча, өз кезегінде, әлеуметтік диалог және қызметкерлердің құқықтарын қорғау саласындағы ынтымақтастықты одан әрі тереңдетуге дайын екендігін білдірді.
Сатыбалды Дәулеталин мен Саранго Раднарагча әлеуметтік-еңбек саласының өзекті мәселелері бойынша бірлескен консультациялар өткізу туралы келісті.
ҚРКФ Кәсіподақтық коммуникация орталығы