Сәрсенбі күні, 18 ақпанда, Кәсіподақтар федерациясының келісу комиссияларының мүшелеріне арналған онлайн-семинары өтті. Семинарға «Қамқор Магистраль» көліктік жөндеу кәсіпорындарының салалық кәсіподағы» қоғамдық бірлестігінің өкілдері мен кәсіподақ белсенділері қатысты. Қатысушылар еңбек дауларын шешу тәжірибесімен алмасып, өзекті сұрақтарға жауап алды.
Спикер ретінде Қазақстан Республикасы Кәсіподақтар федерациясы Кәсіподақтық коммуникация орталығы директорының орынбасары, еңбек қатынастары жөніндегі сарапшы, кәсіподақ білімі үйлестірушілерінің жаһандық желісінің мүшесі және Халықаралық еңбек ұйымы Халықаралық оқу орталығының түлегі Ләззат Есжанова сөз сөйледі.
Өз сөзінде спикер жеке еңбек дауларын қарау тәртібіне, келісу комиссиясының құзыретіне және процедуралық талаптарға егжей-тегжейлі тоқталып өтті. Бұдан бөлек, еңбек заңнамасын дұрыс қолданудың маңыздылығы мен дауларды сотқа дейінгі тиімді реттеудің артықшылықтары атап көрсетілді.
Ләззат Есжанова келіссөздер жүргізу мәдениетін дамыту әлеуметтік әріптестікті нығайтудың негізгі механизмі екенін атап өтті. Өзара сенімге негізделген диалог, дәлелді құқықтық позиция және ымыраға келу қабілеті келісу комиссиясы жұмысының нәтижелілігін айтарлықтай арттырады. Тәжірибелік мысалдар арқылы келісімге қол жеткізу жолдары мен коммуникацияның тиімді әдістері түсіндірілді.
Іс-шара қорытындысы бойынша келісу комиссияларының қызметін одан әрі жетілдіру, еңбек заңнамасын жүйелі әрі сауатты қолдану, сондай-ақ дауларды сотқа дейінгі реттеу тәжірибесін нығайту қажеттілігі баса айтылды.
Қазақстан Республикасы Кәсіподақтар федерациясының Кәсіподақтық коммуникация орталығы апта сайын әртүрлі салалардағы келісу комиссиялары мүшелерін оқытуды жүргізіп отырады. Білім беру іс-шаралары құқықтық сауаттылықты арттыруға, келіссөздер жүргізу құзыреттілігін дамытуға және қызметкерлердің еңбек құқықтарын қорғаудың тиімді механизмдерін қалыптастыруға бағытталған.
ҚРКФ Кәсіподақтық коммуникация орталығы