25 – 27 наурыз аралығында М.Өтемісұлы атындағы Батыс Қазақстан мемлекеттік университетінің спорт сарайында Батыс Қазақстан облыстық білім және ғылым қызметкерлерінің кәсіподақ мүшелері арасында ұйымдастырылған облыстық V – ші «Денсаулық» спартакиадасы өз мәресіне жетті. Спартакиада Жастар жылына орай ұйымдастырылған болатын.
Осымен дәстүрлі түрде бесінші мәрте ұйымдастырылып отырған білім және ғылым қызметкерлерінің аталмыш спартакиадасы Қазақстандық салалық білім және ғылым қызметкерлері кәсіптік одағының Батыс Қазақстан облыстық білім және ғылым қызметкерлері кәсіподағының төрағасы М.О.Даупаевтың бастамасымен, Батыс Қазақстан облысы білім басқармасының басшысы Ш.М.Қадырованың және М.Өтемісов атындағы Батыс Қазақстан мемлекеттік университетінің ректоры Н.Х.Серғалиевтің қолдауларымен ұйымдастырылып отыр.
Батыс Қазақстан облыстық Кәсіподақтар орталығының төрағасы А.Таспихов бастаған кәсіподақ көшбасшылары спорттық шараға арнайы қатысты.
Батыс Қазақстан облыстық білім және ғылым қызметкерлерінің кәсіподақ ұйымы өзінің саналы ғұмырында педагогика саласына зор үлес қосып, аянбай еңбек еткен ардақты ардагерлерді әрқашан да құрмет тұтатының көрсетіп, спартакиаданың ашылу салтанатына педагогика саласының ардагерлерін гүлшоқтарымен қарсы алып, төрге оздырды, олар: С.Бисембаева, М.Кадыров, М.Лукьянова, К.Төкестай, Р.Турашева, Н.Галиева, К.Ильясов. Сонымен қатар, ұзақ жылдар бойы білім және ғылым саласында аянбай еңбек етіп жүрген облысымыздың профессор-оқытушылар құрамы, бүгінде қоғамымыздың белсенді қайраткерлері де құрметті қонақтардың қатарында болды.
«Өрлеу» біліктілікті арттыру ұлттық орталығы» акционерлік қоғамының филиалы «Батыс Қазақстан облысы бойынша педагогикалық қызметкерлердің біліктілігін арттыру институты» БКҰ төрайымы, Батыс Қазақстан облыстық білім және ғылым қызметкерлерінің кәсіподақ ұйымы жастар ісі комитетінің төрайымы И.Бадакова мен орынбасары Орал қалалық №14 ЖОББМ дене шынықтыру пәнінің мұғалімі Ж.Тайшыбаев та қатысты.
Аталған сайыста бақ сынауға білім және ғылым саласының Ақжайық, Бәйтерек, Бөкей ордасы, Бөрлі, Жаңақала. Жәнібек, Казталовка, Қаратөбе, Сырым, Тасқала, Теректі, Шыңғырлау аудандарының құрама командалары, М.Өтемісов атындағы БҚМУ құрама командасы, Қазақстандық инновациялық және телекоммуникациялық жүйелер университетінің құрама командасы, Колледждер құрама командасы, Облыстық білім беру мекемелері құрама командасы, Орал қалалық №14 ЖОББМ құрама командасы, Орал қалалық №48 ЖОББМ құрама командалары қатысты.
Спартакиаданың бас төрешісі болып М.Өтемісов атындағы БҚМУ дене шынықтыру кафедрасының меңгерушісі Л.Демченко тағайындалды.
Спартакиада ҚР бекітілген ережелерге (олимпиадалық жүйе) сәйкес спорттың екі түрінен, атап айтқанда волейбол және үстел теннисінен өткізілді.
Батыс Қазақстан облысының барлық аудандарындағы және қала көлеміндегі білім және ғылым мекемелерін түгелге дерлік қамтып, 3 күнге созылған тартысты дода 27 наурыз күні өз мәресіне жетті.
Қорытындысында, жүлделі орындар мен арнайы сыйлықтарға ие болған командалар мен үздік ойыншылар бағалы сыйлықтармен марапатталса, жалпы командалық есеп бойынша І-орынды иеленген №14 ЖОББМ құрама командасы Білім және ғылым қызметкерлері кәсіподағының ауыспалы кубогы мен «Ақжайық» шипажайына жолдаманы өз қанжығаларына байлады.
Жалынды жастар ойынның қызықты да тартысты сәттерін еске алып, жеңімпаздар мен жүлдегерлер бір-бірін құттықтап, командалармен естелік суретке түсіп, спорт сарайында жеңістің құрметіне әуелеген Е.Хасанғалиев ағамыздың «Атамекен» әнін қосыла шырқап, жеңісті күндерде жолығайық деген тілекпен келесі кездесуге дейін қош айтысты.