Қазақстандағы медицина қызметкерлерінің жалақысын көтеруге 88 миллиардтан астам теңге бөлінді. Бұл туралы депутаттық сауалға жауап бере отырып, ҚР Премьер-Министрінің орынбасары Ералы Тоғжанов мәлімдеді.
«Мемлекет басшысы өзінің 2019 жылғы 2 қыркүйектегі және 2020 жылғы 1 қыркүйектегі Қазақстан халқына Жолдауында мұғалімдердің, медицина қызметкерлерінің, мәдениет қызметкерлерінің жалақысын көтеруге бұйрық берді. Осы бұйрықты орындау шеңберінде 2020 жылдың 1 қаңтарынан бастап білім беру ұйымдары мұғалімдерінің жалақысы 25% -ға көтерілді (2023 ж.-ны қоса алғанда жыл сайынғы өсіммен 25% -ға дейін), республикалық деңгейдегі мәдениет ұйымдары қызметкерлерінің – 50% -ға, жергілікті деңгейде – 35% -ға. Сондай-ақ, медицина қызметкерлерінің жалақысы көтерілді (01.07.2019 ж. бастап – 30%, 01.01.2020 ж. бастап – 30%)», – деді Ералы Тоғжанов.
Ресми жалақының осылай өсуі басқа салалардағы медицина қызметкерлеріне әсер етпегендігіне байланысты (оның ішінде мектепке дейінгі ұйымдар, мектеп-интернаттар және балалар үйлері), Денсаулық сақтау министрлігі 2021 жылдың 1 қаңтарынан бастап олардың қызметтік жалақыларына түзету коэффициенттерін белгілей отырып, барлық қызмет салаларындағы медициналық қызметкерлердің жалақысын көтеруді көздейтін қаулы жобасын әзірледі.
«Сонымен бірге, басқа салалардағы медицина қызметкерлерінің жалақысы денсаулық сақтау қызметкерлерінің жалақысының деңгейіне дейін көтеріледі. 2021 жылдың 1 қаңтарынан бастап білім беру ұйымдарының медицина қызметкерлерін қоса алғанда, барлық қызмет салаларында медициналық қызметкерлердің жалақысын көтеру үшін 88,2 миллиард теңге көлемінде республикалық бюджеттен қосымша қаражатқа қолдау көрсетілді (оның ішінде 2021 жылы 20,9 миллиард теңге), 2022 жылы – 32,3 миллиард теңге, 2023 жылы – 35 миллиард теңге) », – деді Қазақстан Республикасы Премьер-Министрінің орынбасары Ералы Тоғжанов.
«Сондай-ақ, Білім және ғылым министрлігі Қаржы министрлігімен бірлесіп білім беру ұйымдарының кітапханашыларына ресми жалақыдан 30% мөлшерінде қосымша төлем белгілеу үшін 2021 жылға 1,8 млрд.теңге сомасында қосымша бюджеттік қаражат бөлу мәселесін пысықтап жатыр. Жалпы, бұл мәселелер Үкіметтің тұрақты бақылауында », – деп атап өтті вице-премьер.
Айта кету керек, бұған дейін Кәсіподақтар федерациясы Қазақстан Республикасының Үкіметіне бірқатар Үндеумен шыққан болатын. Олар білім беру, денсаулық сақтау ұйымдарындағы қызметкерлердің жекелеген санаттары үшін қосымша төлемдер мен үстемелер жүйесін, сондай-ақ отандық өндірушілерді мемлекеттік қолдау мәселелерін реттеуге қатысты болды.
Қазақстан Республикасы Премьер-Министрі орынбасарының депутаттық сауалға берген жауабы ҚРКФ-ның үндеулері белгілі бір деңгейде Үкіметтен қолдау тапқанын көрсетеді.
Кәсіподақтардың ұстанымын ескере отырып, Қазақстан Республикасы Үкіметінің қаулысымен эпидемияға қарсы іс-шараларға қатысқан әскери госпитальдардың медициналық қызметкерлеріне денсаулық сақтау жүйесіндегі медицина қызметкерлері деңгейінде сыйақы тағайындалды.
Қазіргі кезде Федерация Қазақстан Республикасы Үкіметінің деңгейінде медициналық қызметкерлердің коронавирустық инфекцияны (вирустық пневмониядан) жұқтыру мен өлім жағдайларын оларға тиісті сақтандыру төлемдерін алуға мүмкіндік беретін жазатайым оқиғаларға жатқызу мәселесін көтеруде.
Пандемия басталғаннан бері Федерация және оның мүшелік ұйымдары азаматтарға 500 миллион теңгеден астам сомада материалдық көмек көрсетті. Бұл қаражат жеке қорғаныш құралдары, аз қамтылған азаматтарға, зейнеткерлерге, еңбек ардагерлеріне қажетті тауарларды сатып алуға, бақылау бекеттері мен ауруханаларда медициналық қызметкерлерге ыстық тамақ ұйымдастыруға, сондай-ақ дәрігерлер мен олардың отбасыларына материалдық қолдау көрсетуге жұмсалды.
ҚР Кәсіподақтар федерациясының медиа орталығы