Жуырда ауыл шаруашылық саласының ардагері Батыр Жұмағазыұлы Ялпақов 90 жасқа толды. Мерейтой иесін Тасқала ауданының әкімі Бауыржан Айтмағамбетов, ардагерлер кеңесінің төрағасы Жәрдемғали Балықов құттықтады. Тоқсанның төріне қадам басқан Батыр Жұмағазыұлына жылы лебіздерін жеткізді. Ауданда абыройы биік тұлғаның иығына шапан жауып, құрмет көрсетті.
Ялпаков Батыр Жұмағазыұлы 1932 жылдың 10 сәуірінде Тасқала ауданы Қараой (бұрынғы Черная Падина) ауылында дүниеге келді. 1939 жылы Қараой ауылында мектеп табалдырығын аттап, 1946 жылы Кулаков совхозында 5-7 сыныпты үздік аяқтайды. Сол жылдың желтоқсан айынан бастап Қараой ауылында жұмысқа орналасады. 1948 жылы «Механикаландыру мектебінің бұқаралық біліктілік кадрларын даярлау» мамандығын оқып, 1949 жылдың 23 наурызында оқуын ойдағыдай аяқтап, қызыл аттестатын алады.
Содан соң 1949-1953 жылдары арасында механизатор қызметін атқарды. 1953 жылы Назым жолдасымен отау кұрады. Сол жылы тамыз айында Кеңес үкіметінің армия қатарына шақырылып, 1956 жылы Отан алдындағы борышын абыроймен өтеп келеді. Әр жылдары 1981 жылы шебер-реттеуші, 1987-1992 жылдар аралығында Қараой ауылында ауыл шаруашылығының меңгерушісі болып жұмыс атқарды. 1992 жылдың бастап зейнеткерлік демалысқа шықты.
Әр уақытта ауданның ауыл шаруашылық саласының дамуына қосқан үлесі үшін аудан әкімі ризашылығын білдіріп, мерейтой иесіне ниетін білдірді.