Бейсенбі, 17 қараша күні Халықаралық кәсіподақтар конфедерациясының Бас кеңесі Қазақстан Республикасы Кәсіподақтар федерациясының мүшелігін қалпына келтіру туралы шешім қабылдады. Бұл туралы ҚРКФ төрағасы Сатыбалды Дәулеталин Facebook парақшасында хабарлады.
Еске салайық, төраға бастаған Қазақстан Кәсіподақтар федерациясының делегациясы Аустралияның Мельбурн қаласында өтіп жатқан Халықаралық кәсіподақтар конфедерациясының V конгресінің жұмысына қатысуда.
«Қазір ХКК Бас кеңесінің отырысы өтуде. Жаңа ғана Кәсіподақтар федерациясының Халықаралық кәсіподақтар конфедерациясына мүшелігі туралы мәселе қаралды. Кәсіподақтар федерациясының ХКК мүшелігін қалпына келтіру туралы шешім қабылданды. Дегенмен еліміздегі бірлестіктер бостандығын қамтамасыз ететін заңнамалық реформалардың жүзеге асырылуы маңызды», – деді Сатыбалды Дәулеталин.
2022 жылдың 17-22 қарашасы аралығында 300-ден астам ұлттық кәсіподақ орталықтарының делегаттары алдағы төрт жылға арналған Дүниежүзілік кәсіподақтар қозғалысының күн тәртібін талқылайды.
Конгресс қатысушылары мүше-елдердегі тұрақтылықты сақтау бойынша ұсыныстар көрсетілетін «Жаңа әлеуметтік келісімшарт» мәлімдемесін қабылдауға ниетті. Мәлімдеме жобасына сәйкес, талқылау жаңа әлеуметтік келісімшарт тақырыбына: жасыл жұмыс орындары, жұмыскерлердің құқықтары, әділетті жалақы, әлеуметтік қорғау, теңдік және инклюзивтілікке арналады.
«COVID-19 пандемиясының салдары бүкіл әлем бойынша 250 миллионнан астам жұмыс орнын жойып жіберді және көптеген елде толық емес жұмыспен қамту ауқымы белең алуда. Пандемияға дейін де үкіметтер саясаттың орталық мақсаты ретінде толық жұмыспен қамтуға азғана ниет танытқан. Толық жұмыспен қамтуға қол жеткізу үшін 575 миллион жаңа жұмыс орнын ашу қажет», – делінген мәлімдемеде.
Айта кетейік, Халықаралық кәсіподақтар конфедерациясы – 161 елден 176 миллион адам кіретін әлемдегі ең ірі кәсіподақ бірлестігі. 2018 жылы Қазақстан Кәсіподақтар федерациясының ХКК мүшелігі тоқтатылған болатын.
ҚР Кәсіподақтар федерациясының медиаорталығы