Бүгінде білім өркениетті елдердің құнды капиталына, сенімді тірегіне айналуда. Білім менеджментін дамыту мен үздіксіз білім алуды мақсат еткен, болашақтың құзіретті тұлғасын тәрбиелеудегі зор міндетті жүктеген жас маман— келешек ұлт ұстазы.
Еліміздің басқа мемлекеттермен қарым-қатынасы артып отырған шақта ағылшын тілін еркін меңгерген, келешекте білімін түрлі саладағы қарым-қатынас жағдайында пайдалана алатын адамды мектеп қабырғасынан оқытып шығару – біздің міндетіміз. Ағылшын тілін тереңдетіп, жан-жақты оқытуды қоғам, уақыт қажет етіп отыр. Қазақстан Республикасының тәуелсіз елге айналып, әлемдік өркениеттің даму жолына түсуі, ағылшын тілін жетік меңгертуді талап етеді. Шетел тілін терең меңгеріп, оны өскелең ұрпаққа үйретуді міндет еткен жас мамандардың бірі- Әйтеке би ауданы, Қарабұтақ ауылы, Т.Г.Шевченко атындағы ЖОББ мектебінің ағылшын тілі пәні мұғалімі Менора Әбдікәрімова.
Педагогика әлеміне аяқ басқан жас маман оқушылардың тілдерге деген қызығушылығын, оны үйренуге құштарлығын оятып, басқа елдің тілін, мәдениетін, тарихын және әдет-ғұрпын танып білуіне ықпал етіп келеді. Оқушыларды әндермен, тақпақтармен, оқулық және ертегі кейіпкерлерімен таныстыра отырып, тілді тез меңгеруге үйретіп келеді. Шәкірттеріне дәстүрлі сабақ берумен қатар, қосымша жұмыстармен айналысып, түрлі платформаларда видеолар түсіріп, қызықты ойындар ойнатып оқушының жанын түсінуге жұмыстанып жүреді.
Менора Әбдікәрімова екі жылдың ішінде жоғары жетістіктерге қол жеткізіп, өзінің біліктілігін дәлелдей білді. Жас маман спорт пен өнерден де құр алақан емес.
Мәселен, 2020 жылы ағылшын тілі бойынша мұғалімдерге арналған Республикалық қашықтық олимпиадасынан 3-ші орын, 2020 жылы «Wonderful winter» ағылшын тілінде мәнерлеп оқу сайысында шәкірті Зейнолла Тамина ІІ орынға ие болды.
2021 жылы ағылшын тілі пәні мұғалімдері арасында өткен облыстық пәндік олимпиадада 2-ші орын иегері атанды. Сол жылы ағылшын тілі пәнінен ұстаздар арасындағы онлайн блиц-турнирдің жеңімпазы болып танылды.
Сондай-ақ, былтыр білім беру қызметкерлері арасында өткізілген дәстүрлі спартакиадаға белсене қатысып, жас ұрпаққа салауатты өмір салтын үлгі етіп, жан-жақты білімі мен кәсіби шеберлігін көрсеткені үшін алғыс хатпен марапатталды. Волейбол, үстел теннисінен өткен турнирлерге де белсене қатысып, жеңіс тұғырынан көрініп жүр.