Кәсіподақтық шипажайларға ақпараттық тур бүгін «Көктем» шипажайында жалғасты.
Кездесуді ашқан Кәсіподақтар федерациясы төрағасының орынбасары Нұрлан Өтешев кәсіподақтық шипажайларын онлайн аралаудың мақсаты мен міндеттері туралы айтты.
«Ақпараттық турдың мақсаты – кәсіподақ шипажайларының әлеуетін көрсету, кәсіподақ мүшелерінің денсаулығы үшін өзара тиімді шарттарды ашық талқылау. Алғашқы кездесу кеше «Жаңақорған» шипажайында өтті, онда өте құнды пікірлер айтылды. Бұл кездесулер бізді қызықтыратын сұрақтарға жауап алуға және тиімді шешімдерді бірге табуға мүмкіндік беретініне сенімдімін», – деді Нұрлан Өтешев.
«Көктем» шипажайы» АҚ басқарма төрағасы Ғани Әлденейов қатысушыларға шипажайдың мүмкіндіктері, сауықтыру бағдарламалары, шипажайдың медициналық базасы мен нөмірлік қоры туралы айтып берді.
Ғани Әлденейевтің айтуынша, шипажай Алматы қаласынан 3 шақырым жерде Іле Алатауының «Ремизовский» тау шатқалында теңіз деңгейінен 1100 метр биіктікте орналасқан. Шипажайда минералды судың көзі бар.
«Шипажайда емдік -диагностикалық ғимарат бар, ол заманауи қондырғылармен және аппараттармен жабдықталған, бұл бізге медициналық процедуралардың кең спектрін ұсынуға мүмкіндік береді», – деді Ғани Әлденейев.
Физиотерапия және электро жарық терапиясы және басқа процедуралар заманауи аппараттарымен жүргізіледі.
Мекеме ас қорыту жүйесі, бауыр, өт жолдары, урологиялық аурулар, созылмалы және кәсіби интоксикация, жүрек -қантамыр жүйесі аурулары, тері аурулары және басқа да салаларды емдеуге маманданған.
Жолдама бағасына күніне 5 рет тамақтану, дәрігердің нұсқауы бойынша кешенді емдеудің жеке таңдауы, қызықты демалыс, минералды ванналар, минералды бассейн, емдік душтар, магниттік терапия, физиотерапия және процедуралардың басқа түрлері кіреді.
«Диеталық тамақтану курорттық емнің ажырамас бөлігі болып табылады. Біздің шипажайда диетаға жаңа піскен көкөністер мен жемістерді енгізуге ерекше көңіл бөлінеді »,-деді акционерлік қоғам басшысы.
Медициналық қызметтерге сұраныс туралы айта отырып, ол 2021 жылдың 10 айында 10 486 жолдама сатылғанын, оның 6850 -ін жеке тұлғалар, 1126 -ын кәсіподақ мүшелері және 2510 -ын корпоративтік клиенттер сатып алғанын айтты.
Кездесуге қатысушылар санаторийдің сауықтыру қызметіне, сондай -ақ кәсіподақ мүшелеріне баға саясатын реттеу мүмкіндіктеріне қатысты өз сұрақтарын қойды.
Мүшелік ұйы өкілдері ауруларды емдеу мен алдын алуда, кәсіподақ мүшелерінің денсаулығын сақтауда, олардың еңбекке қабілеттілігі мен белсенді өмірінде ҚРКФ шипажайлық кешенінің маңызды рөлін атап өтті.
Естеріңізге сала кетейік, ҚРКФ кәсіподақтық шипажайларға ақпараттық тур ұйымдастыруда. Ол 18 қазанда «Жаңақорған» шипажайынан басталды. Келесі кездесу аясында Жамбыл облысындағы «Мерке» шипажайында өтеді.
Қазақстан Республикасы Кәсіподақтар Федерациясының медиа орталығы