17 наурыз, жұма күні Қазақстан Республикасы Кәсіподақтар федерациясының төрағасы Сатыбалды Дәулеталиннің жетекшілігімен ҚРКФ Атқару комитетінің кезекті отырысы өтті.
Кәсіподақтар федерациясы жариялаған «Қауіпсіз еңбек жылы» аясында Атқару комитетінің мүшелері тиісті іс-шаралар жоспарын қабылдады.
Қауіпсіз еңбек жылын өткізуге арналған іс-шаралар жоспарымен ҚРКФ төрағасының бірінші орынбасары Мұхтар Тінікеев таныстырды. Оның айтуынша, осы жыл ішінде еңбекті қорғауды күшейту және қауіпсіздік деңгейін арттыру мақсатында Кәсіподақтар федерациясы «ҚР Кәсіподақтар федерациясының еңбекті қорғау жөніндегі үздік техникалық инспекторы-2023» атағын алуға арналған республикалық байқауды, «Үздік кәсіподақ ұйымы – қауіпсіз еңбек саласындағы көшбасшы-2023» байқауын, «Жарақатсыз бір күн» акциясын, «Қауіпсіз еңбек» ақпараттық науқанын өткізеді.
Сонымен қатар, Кәсіподақтар федерациясы елдегі өндірістік жарақаттану жағдайына кәсіподақтық талдау жүргізеді, кәсіпорындардағы өндірістік жарақаттануды төмендету бойынша жол карталарын әзірлеп, осы саладағы заңнаманы жетілдіру бойынша ұсыныстарды қалыптастырады.
Қауіпсіз еңбек жылының қорытындысы «Қауіпсіз еңбек – қоғамның табысты дамуының негізі» Кәсіподақтар федерациясының республикалық форумында шығарылады.
Баяндамашыны тыңдаған ҚРКФ төрағасы Сатыбалды Дәулеталин өндірістік жарақаттану деңгейін төмендетуде жоспардағы әрбір тармақтың практикалық маңыздылығын атап өтті.
«Жоспарды жүзеге асыру бастауыш кәсіподақ ұйымы бар әрбір кәсіпорында еңбек қауіпсіздігін бақылауды күшейтуге мүмкіндік береді. Біз «ASPANS», «Vizion Zero» және «Халықтық бақылау» жобаларының ауқымын кеңейтуді қолдаймыз. Бұл мәселені барлық әлеуметтік әріптестермен пысықтау қажет», – деді Қазақстан Республикасы Кәсіподақтар федерациясының төрағасы.
Атқару комитетінің мүшелері Қарағанды облысында пилоттық режимде іске қосылатын «Бірінші кәсіподақтық сауда желісі» жобасын қарады.
Отырыста Жаңаөзен қаласында кәсіподақ орталығының өкілдігін ашу арқылы ұйымдық-штаттық құрылымды кеңейтуді қарастыратын Маңғыстау облысының кәсіподақ орталығын қолдау шаралары бекітілді.
«Маңғыстау облысындағы әлеуметтік-еңбек қатынастары кәсіподақтардың ерекше бақылауында. Біз үшін мұнай-сервистік және мұнай өнеркәсібі кәсіпорындарындағы әлеуметтік әріптестер қарым-қатынасындағы тұрақтылықты сақтау маңызды. Сондықтан жаңаөзендік кәсіподақтардың өзекті мәселелерімен облыстық кәсіподақ орталығының өкілі айналысады. Сондай-ақ, еңбек құқықтары жөніндегі тәжірибелі заңгерлермен штат санын күшейтіп жатырмыз», – деді Сатыбалды Дәулеталин.
Келесі аптада Ақтауда еңбек дауларының алдын алуда еңбек заңнамасын қолдану тәжірибесі бойынша өңірдегі жұмыс берушілер мен жұмыскерлерге арналған кезекті кәсіподақтық оқу марафоны өтеді.
Жаңа өңірлердің ашылуына байланысты Федерацияның Атқару комитеті Алматы, Шығыс Қазақстан, Қарағанды облыстарының кәсіподақ орталықтарының өкілеттіктерін кеңейтті.
Бұл шара еліміздің жаңа аймақтары: Жетісу, Абай және Ұлытау облыстарындағы әлеуметтік әріптестермен толыққанды қарым-қатынасты қамтамасыз ету үшін қажет.
Сонымен қатар, отырыс барысында «Қазақстан Республикасы Кәсіподақтар федерациясының наградалары мен белгілері туралы ережеге» өзгерістер мен толықтырулар қабылданды.
Жаңа нормаларға сәйкес кәсіподақ наградалары мемлекеттік, ұлттық және кәсіби мерекелерде беріледі.
ҚРКФ медиаорталығы