Статистика маманының еңбегі көп қырлы, қазіргі статистикалық деректердің сапасына қойылатын талаптар да өте жоғары. Статистикадағы сапа тұжырымдамасы деректердің уақтылығы мен қамтылуымен шектелмейді. Ақпараттың рөлі үнемі арту үстінде. Статистикалық деректер күрделі эконометриялық модельдерде, ғылыми зерттеулерде, болжау және маңызды мәселелерді шешуде қолданылады.
Кез келген кәсіпорынның, мекеменің тарихын зерделеп қарайтын болсақ, алғаш ірге тасын қалағаннан бастап біртіндеп қалыптасуына, дамуына, шыңдала төсуіне ат салысып, адал еңбек атқарып, бүкіл тағдырын арнап өтетін тұлғалар көп кездеседі. Қазіргі таңда Павлодар облысының статистика департаментінің жемісті еңбек етуі сол адамдардың салып кеткен сара жолы десек болады.
Жұмагелді Жұмабайұлы Нұрғалиев 1961 жылы туған, білімі жоғары. 1983 жылы Павлодар индустриалды институтын инженер мамандығы бойынша тәмамдаған.
Жұмагелді Жұмабайұлы еңбек жолын 1983 жылы бастаған. 1983 жылдың қараша айынан бастап 1985 жылға дейін Павлодар облысы Шарбақты техникумында оқытушы болып қызмет атқарды. 1985 жылдан 1989 жылға дейін Шарбақты техникумының комсомол комитетінің хатшысы болып жұмыс істеді. Шарбақты аудандық жұмыспен қамту орталығының директоры болып тағайындалды, кейін Шарбақты ауданы еңбек биржасының директоры болып жұмыс істеді..2007 жылдан бастап бүгінгі күнге дейін Қазақстан Республикасы Стратегиялық жоспарлау және реформалар агенттігінің Ұлттық статистика бюросының Павлодар облысы бойынша департаменті Шарбақты ауданы бойынша статистика басқармасының басшысы қызметінде.
Жұмыс барысында өзін жауапкершілігі зор, өзіне және қызметкерлеріне қатаң талап қоя білетін білікті басшы ретінде көрсетті. Есеп саласында жаңа әдістемелік жаңалықтарды іс жүзінде тиімді пайдалана білді. Еңбек тәжірибесі мол екендігін есеп-қисабының мерзімді әрі сапалы орындалғанынан байқалды. Әріптестері және жас мамандармен өзінің мол еңбек тәжірибесімен бөліседі, әсіресе жастарға ауыл шаруашылығы статистикасы бойынша жинаған білімі мен дағдыларын үйретуге бар күш-жігерін салады. Департаменттің қоғамдық өміріне белсенді қатысады. Адал еңбегі және статистиканы дамытуға қосқан зор үлесі үшін «Статистика үздігі» марапатталды.