Бүгін Шымкент қаласында Аумақтық кәсіподақтар бірлестігі Үйлестіру кеңесінің отырысы өтті. Шымкент қаласы Кәсіподақ орталығының төрағасы Бауыржан Әлтеев ҚР Кәсіподақтар федерациясы Бас кеңесінің 2026 жылы 23 қаңтарда өткен отырысының қорытындылары туралы баяндама жасап, ағымдағы жылға арналған жұмыс жоспарын таныстырды.
ҚРКФ Бас кеңесінің отырысында 2025 жылдың қорытындылары шығарылып, Кәсіподақтарды цифрлық жаңғыртудың 2030 жылға дейінгі тұжырымдамасы қабылданғаны атап өтілді.
Күн тәртібіне сәйкес, Кәсіподақ орталығының төрағасы Қазақстан Республикасындағы конституциялық реформа мәселелеріне егжей-тегжейлі тоқталды. Бауыржан Әлтеев 2026 жылғы реформаның іргетасы Мемлекет басшысының 2025 жылы 8 қыркүйектегі Жолдауында қаланғанын — бұл жай ғана жекелеген түзетулердің жиынтығы емес, мемлекет пен қоғам арасындағы жарты жылдық ауқымды диалогтың нәтижесі екенін баса айтты.
Ол Президент Жарлығымен құрылған Конституциялық комиссия — еліміздің болашағының құқықтық негізін қалайтын ауқымды сарапшылар тобы және кең диалог алаңы екеніне назар аударды. 130 адамнан тұратын комиссияның өзегін тәжірибелі заңгерлер мен конституциялық құқық саласындағы мамандар құрайды, ал реформалардың экономикалық және әлеуметтік салдарын бағалау үшін жетекші экономистер, саясаттанушылар мен қоғам қайраткерлері тартылды.
Өз сөзінің соңында Кәсіподақ орталығының басшысы кәсіподақтардың басты мақсаты — әрбір қызметкерге қауіпсіз еңбек жағдайын, лайықты еңбекақыны және ертеңгі күнге деген сенімділікті қамтамасыз ету екенін тағы да атап өтті.
Отырыс қорытындысы бойынша қызметтің барлық бағыттары бойынша нақты тапсырмалар беріліп, 2026 жылға арналған жұмыс жоспары бекітілді.