Бейсенбі, 9 сәуір күні Қазақстан Республикасы Кәсіподақтар федерациясының Төрағасы Сатыбалды Дәулеталин Түркістан облысына жұмыс сапарының алғашқы нысандары ретінде Ерқанат Тәңірбергенов атындағы Түркістан индустриалды-техникалық колледжі және колледждің серіктесі — «Жолаушы» ЖШС автобус паркі таңдалды.
Ерқанат Тәңірбергенов атындағы Түркістан индустриалды-техникалық колледжі — көлік, IT және логистика салаларына маман даярлайтын өңірдегі жетекші оқу орындарының бірі. Бүгінгі таңда колледжде 68 қызметкер жұмыс істейді, оның 54-і — оқытушылар, олардың арасында ғылым кандидаттары, PhD, профессорлар, доценттер мен магистрлер бар. Қазіргі уақытта колледжде 1054 студент білім алуда.
Колледж директоры Меруерт Құлбаева дуалды білім беру жүйесі бойынша оқу жүйесінің негізгі бағыттары туралы айтып берді.
«Бізде бес бағыт бойынша оқыту жүргізіледі: бағдарламалық қамтамасыз ету (IT), автокөлікке техникалық қызмет көрсету және жөндеу, есептеу техникасы және ақпараттық желілер, тасымалдауды ұйымдастыру және теміржол мен автомобиль көлігінде қозғалысты басқару. Біздің студенттер облыстық және республикалық деңгейдегі WorldSkills кәсіби шеберлік чемпионаттарына белсенді қатысады. 2025 жылы Санжар Мансуров «Бейнемонтаж» құзыреттілігі бойынша екінші орынды иеленсе, Дәулетбек Искандеров компьютерлік ойындарды 3D-модельдеудегі кәсібилігі үшін медаль алды», — деп хабарлады ол.
Оның айтуынша, студенттердің жетістіктері тек олардың жеке күш-жігерінің ғана емес, сонымен қатар колледждің кәсіпорындармен тығыз іс-қимылының нәтижесі.
«Біз мастер-кластар мен дөңгелек үстелдер өткізу үшін теміржол саласының мамандарын, жолаушылар тасымалы саласындағы автомеханиктерді — тәжірибелі мамандарды белсенді түрде шақырамыз. Биыл облыстық деңгейде «Автомеханик — заманауи колледж шебері» атты іс-шара өтті, онда студенттер сұрақтар қойып, болашақ мамандықтарының ерекшеліктерімен таныса алды», — деді колледж директоры.
Сондай-ақ, ол колледж түлектерін жұмысқа орналастыру мәселелеріне ерекше назар аударды.
«Осы оқу жылында біз жұмыс берушілермен мамандарды бірлесіп даярлау туралы жаңа келісімдерге қол қойдық, бұл оқу бағдарламаларын еңбек нарығының талаптарына бейімдеуге мүмкіндік береді және түлектердің жұмысқа орналасуына кепілдік береді», — деп толықтырды Меруерт Құлбаева.
Кәсіподақтың рөлі мен әлеуметтік қолдау мәселелері туралы айта келе, ол колледжде кәсіподақ жұмыс істейтінін, оның төрағасы Бейбіт Нәлібек екенін айтты.
«Барлық оқытушылар кәсіподақ мүшелері құрамында. Кәсіподақ ұжымды белсенді қолдайды. Қызметкерлерді Құрмет грамоталарымен және Алғыс хаттармен марапаттайды, сондай-ақ жоғары нәтиже көрсеткен және іс-шараларға белсенді қатысқан студенттерді ынталандырады. Студенттер мен олардың жетекшілері кәсіподақ есебінен сауықтырудан өту мүмкіндігіне ие болады. Биыл біздің екі оқытушымыз Сарыағаш шипажайында демалып қайтты», — деп атап өтті білім беру мекемесінің директоры.
Өз кезегінде, колледж негізін қалаушы Рахым Тәңірбергенов Кәсіподақтар федерациясының Төрағасы Сатыбалды Дәулеталинге жұмысшы мамандықтарын дамытуға және білім беруге көңіл бөлгені үшін алғыс айтып, кәсіподақтардың ерекше рөлін және жұмысшы мамандықтарының мәртебесін көтеруге қосқан үлесін атап өтті.
«Кәсіподақтар федерациясының Төрағасы Сатыбалды Дәулеталинге жұмысшы мамандықтарын дамытуға, колледждерді және жалпы кәсіптік білім беруді қолдауға жүйелі әрі шынайы көңіл бөлгені үшін терең ризашылығымды білдіремін. Сіздің назарыңыз бен оқытушылар және студенттермен тікелей диалогыңыз еңбек адамы мен сапалы білімнің кәсіподақтар үшін бірінші кезектегі маңызға ие екенін көрсетеді. Білім беру саласындағы кәсіподақтардың рөлін асыра бағалау қиын. Сіздің жұмысыңыздың арқасында оқытушылар өздерін сенімдірек сезінетінін, ал студенттер еңбек нарығында сұранысқа ие нақты дағдыларды алатынын көріп отырмыз», — деді Рахым Тәңірбергенов.
Оқу үдерісімен және аудиториялардың оқу-техникалық жабдықталуымен танысқаннан кейін, Қазақстан Республикасы Кәсіподақтар федерациясының Төрағасы Сатыбалды Дәулеталин оқытушылармен және студенттермен тілдесіп, ел экономикасын дамыту үшін білікті кадрларды даярлаудың маңыздылығын атап өтті.
«Бүгінгі әлем қарқынды өзгеруде. Сондықтан бүгінгі таңда, әсіресе жастар үшін басты мәселе — қандай мамандық таңдайтыныңызда емес, заманауи әлемнің талаптарына бейімделе алуыңызда, сұранысқа ие болуыңызда. Мен индустриалды колледждер сияқты оқу орындарына үлкен құрметпен қараймын. Неге? Өйткені дәл осы жерде экономиканың және жалпы елдің дамуына тікелей әсер ететін мамандар даярланады», — деді Сатыбалды Дәулеталин.
Ол мамандарды даярлау қажеттілігін тәжірибелік дағдылармен және үздіксіз кәсіби дамумен байланыстырды.
«Бүгінде тек дипломның болуы жеткіліксіз. Құжаттың болуы ғана емес, нақты дағдыларға ие болу маңызды. Жылдам ойлай білу, жауапкершілікті өз мойнына алу, командада жұмыс істеу керек. Ең бастысы — оқуды ешқашан тоқтатпау қажет. Даму тек колледж қабырғасымен шектелмеуі тиіс, үнемі кемелденіп, біліктілікті арттырып, алға жылжу қажет», — деді ҚРКФ Төрағасы жастарға арнаған сөзінде.
Сатыбалды Дәулеталин цифрландыру сын-қатерлеріне жеке тоқталып өтті.
«Алдымызда заманауи кезеңнің күрделі сын-қатерлері — жасанды интеллекттің дамуы, автоматтандыру, цифрландыру мәселелері тұр. Мұның бәрі біздің өмірімізге және кәсіби ортамызға белсенді түрде әсер етіп жатыр. Тіпті бүгіннің өзінде жұмыстың бір бөлігін технологиялар атқарып жатқанын өздеріңіз көріп отырсыздар. Жаңа ғана сіздер роботпен мысал көрсеттіңіздер, ал алдағы уақытта бұл процесс тек күшейіп, бұдан да тезірек дами түседі. Дегенмен, бұл жұмыс жойылады немесе барлық мамандықтар керексіз болып қалады дегенді білдірмейді. Өзгерістер, ең алдымен, әлсіз мамандарға әсер етеді. Мамандықты тиісті деңгейде меңгермегендер, қажетті дағдыларды жинақтамағандар, бәсекеге төтеп бере алмағандар зардап шегеді. Тек мықтылар мен құзыретті мамандар ғана қалады. Ал олардың қатарында болу үшін үнемі оқу керек», — деді Кәсіподақтар федерациясының Төрағасы.
Құқықтық сауаттылық пен еңбекшілердің мүдделерін қорғауға қатысты Сатыбалды Дәулеталин әділ жалақы, қауіпсіздік және еңбекке құрмет көрсету мәселелерінің өзектілігін атап өтіп, жаңа Конституцияның маңыздылығына тоқталды.
«Құқықтардың бар болуы ештеңеге кепілдік бермейтінін жастарға жеткізу өте маңызды. Өз құқықтарыңды білу, оларды қалай қорғау керектігін түсіну және тиісті механизмдерді қолдана білу қажет. Жаңа Конституцияның қабылдануымен адамның ең жоғары құндылық ретіндегі рөлі күшейтілді. Бұл еңбек адамы қоғамда негізгі орынды иеленеді дегенді білдіреді», — деп толықтырды ҚР Кәсіподақтар федерациясының Төрағасы.
Кадрлардың кәсіби біліктілігі туралы әңгіме облыс орталығында жолаушылар тасымалын жүзеге асыратын «Жолаушы» компаниясының автопарк ұжымымен кездесуде жалғасты.
«Жолаушы» ЖШС 1966 жылы Түркістан таксомотор паркі болып құрылған, ал 1999 жылы кәсіпорын жауапкершілігі шектеулі серіктестік болып қайта құрылды.
«Жолаушы» ЖШС директоры Рахымжан Еркінов хабарлағандай, тұрғындардың жайлылығы мен қызмет көрсетудің жоғары сапасын қамтамасыз ету үшін автобустар заманауи бейнекамералармен, сондай-ақ кондиционерлермен жабдықталған, билет беруге арналған электронды құрылғылар орнатылған.
«Қаланың барлық аудандарын қолжетімді және ыңғайлы қоғамдық көлікпен қамтамасыз ету мақсатында кәсіпорын 16 бағытқа қызмет көрсетеді. Бүгінгі таңда кәсіпорын қалалық қоғамдық көлікті 100%-ға жаңартты. Соңғы екі жылда қаланың экономикасы мен әлеуметтік саласын дамытуға 2 млрд 382 млн 450 мың теңге инвестиция тартылды», — деді кәсіпорын басшысы.
Қазіргі уақытта автобус паркінде тұрақты жұмыспен қамтылған 300-ге жуық қызметкер жұмыс істейді, олардың барлығы кәсіподақ мүшелері.
Еңбек ұжымымен тілдесу барысында Қазақстан Республикасы Кәсіподақтар федерациясының Төрағасы Сатыбалды Дәулеталин әлеуметтік әріптестікті дамытудың маңыздылығын атап өтті, сондай-ақ қауіпсіз еңбек жағдайларын қамтамасыз ету және қызметкерлер үшін әлеуметтік кепілдіктердің сақталуы мәселелеріне назар аударды.
«Кәсіподақтар федерациясы жұмыскерлердің әлеуметтік кепілдіктеріне ерекше көңіл бөледі. Әрбір кәсіпорындағы басты құжат — жұмыскерлер үшін орындалуы міндетті кепілдіктерді бекітетін ұжымдық шарт. Біздің мақсатымыз — әрбір жұмыскер өзін қауіпсіз сезінуі, ертеңгі күнге сеніммен қарауы. Кәсіпорын басшылығына айтарым: әлеуметтік әріптестікті дамыту — бұл құрғақ есеп үшін жасалатын ресми шара емес, бизнестің тұрақтылығын қамтамасыз ететін стратегиялық ресурс. Ал сіздерге айтарым, құрметті еңбеккерлер: сіздердің белсенді ұстанымдарыңыз бен кәсіподақ жұмысына атсалысуларыңыз — оң өзгерістердің басты кепілі», — деп атап өтті Сатыбалды Дәулеталин.
Осыған байланысты, ҚРКФ Төрағасының айтуынша, алдағы кезеңдегі әлеуметтік әріптестердің негізгі міндеттері — жұмыскерлердің табыс деңгейін арттыру, еңбек жағдайлары мен қауіпсіздігін одан әрі жақсарту, әлеуметтік кепілдіктер мен жұмыскерлерді қолдауды кеңейту және ұжымдық шарттың рөлін күшейту болуы тиіс.
Кәсіподақ қозғалысын дамытуға, әлеуметтік әріптестікті дамытуға қосқан үлесі және адал еңбегі үшін бүгін ҚРКФ Төрағасының қолынан Ерқанат Тәңірбергенов атындағы Түркістан индустриалды-техникалық колледжінің оқытушылары мен «Жолаушы» ЖШС қызметкерлері кәсіподақ марапаттарын алды.
ҚРКФ Кәсіподақтық коммуникация орталығы