Құрметті тұрғын үй-коммуналдық шаруашылық саласының қызметкерлері және ардагерлері!
Сіздерді кәсіби мерекелеріңіз – Тұрғын үй-коммуналдық шаруашылық қызметкерлері күнімен шын жүректен құттықтаймын!
Бұл мереке — қоғамның тыныс-тіршілігін тербеген, еңбегі ерен, төзімі берік сала мамандарына құрмет көрсетілетін мерейлі сәт.
Тұрғын үй-коммуналдық шаруашылығы — бұл мемлекетіміздің әлеуметтік келбетін айқындайтын, әрбір шаңырақтың құты мен берекесін сақтайтын қастерлі сала.
Бүгінгі таңда еліміздің коммуналдық жүйесі — халықтың тұрмыс сапасын арттырудың алтын діңгегі. Қала мен даланың ажарын ашып, суық күні жылу сыйлап, нұрлы жарық пен тіршілік нәрін жеткізу — Сіздердің аптап ыстық пен қаһарлы аязда да тыным көрмей атқарған қажырлы еңбектеріңіздің жемісі.
Күнделікті қарбалас пен жауапкершілігі ауыр міндеттерді иықтарыңыздан түсірмей, халықтың қамы үшін атқарып келе жатқан бұл жұмыстарыңыз шынайы құрметке лайық. Ел игілігі жолында аянбай тер төгіп жүрген Сіздердей азаматтардың сала деңгейін биікке көтерудегі маңызды істерді абыроймен жалғастыратынына кәміл сенемін.
Қазақстан Республикасы Кәсіподақтар федерациясы үшін әрбір еңбек адамының құқығын қорғау, қауіпсіз әрі жайлы еңбек ортасын қалыптастыру және әлеуметтік кепілдіктердің мызғымастығын қамтамасыз ету — ең қасиетті борыш.
Мерекелі сәтте саланың іргетасын қалап, ұрпақтар сабақтастығын сақтаған ардагерлерімізге және бүгінгі күннің нағыз еңбек майталмандарына терең алғысымды білдіремін.
Сіздерге сарқылмас қуат, отбасыларыңызға баянды бақыт және кәсіби жолдарыңызда биік белестер тілеймін. Еңбектеріңіз еленіп, абыройларыңыз асқақтай берсін!
Құрметпен,
ҚР Кәсіподақтар федерациясының төрағасы
С.Дәулеталин