ҚРКФ төрағасы Сатыбалды Дәулеталиннің Павлодар облысына жұмыс сапары жалғасуда.
ҚРКФ төрағасының «ERG Service» ЖШС құрамына кіретін Павлодар машина жасау зауытының ұжымымен кездесуі осы кәсіпорынның еңбеккері Виталий Исаев үшін сәтті билет болды.
Зауыт директоры мен жұмыскерлері – бастауыш кәсіподақ ұйымының мүшелерімен әңгімелесу барысында 40 жастағы электр дәнекерлеуші Виталий Исаев Сатыбалды Дәулеталинге арнайы білім алуға жәрдемдесу туралы сауалымен жүгінді.
«Мен электрмен дәнекерлеуші болып жұмыс істеймін, бірақ менің біліктілігімді арттыруға, білім алуға, инженер болуға деген құлшынысым зор. Оқу ақылы, менің отбасым, балаларым бар, білім алуға (материалдық) мүмкіндік жоқ», – деп шағымданды Виталий.
Мұндай өтініш ҚРКФ төрағасын да, онымен бірге келген делегацияны да бей-жай қалдырмады. Сатыбалды Дәулеталиннің жәрдемдесуімен «Қазметаллкәсіп» салалық кен-металлургиялық кәсіподағы мен комбинат басшылығының мүмкіндіктері жедел талқыланып, Виталий Исаевтың білім алуына қолдау көрсету мәселесі шешілді. Әлеуметтік әріптестер Виталийдің оқуын бірлесіп төлеуге келісті.
Электр дәнекерлеуші Исаевқа қуанышты жаңалықты ҚРКФ төрағасы Сатыбалды Дәулеталин өзі айтты.
«Виталий, біз сіздің өтінішіңізді дереу шештік. Білікті маман болуға, өз ұжымыңызға, зауытыңызға, Отаныңызға бұдан да көп пайда әкелуге деген құлшынысыңызды көріп, біз бей-жай қала алмадық. Сіз таңдаған оқу орнында оқу ақысын «Қазметаллкәсіп» кәсіподағы және жұмыс беруші төлейді. Сәттілік тілеймін!», – деп құттықтады ҚРКФ төрағасы.
Павлодар облысы аумақтық кәсіподақтар бірлестігінің төрайымы Динара Айтжанованың көмегімен бірнеше оқу орындары жаңа студент қабылдауға ынталарын білдірді. Виталий Исаев Павлодар түсті металлургия колледжіне өз таңдауын жасап, жақын күндері мамандығы бойынша шешім қабылдап, қажетті құжаттарды қабылдау комиссиясына тапсыруға ниетті.
Осы ретте, «ERG Service» Павлодар машина жасау зауытының еңбек ұжымымен әңгімелесу барысында зиянды және қауіпті еңбек жағдайында жұмыс істейтін адамдардың еңбекақысын төлеу және зейнет жасын қысқарту мәселелері көтерілді.
ҚРКФ төрағасы Сатыбалды Дәулеталин жұмыскерлерге Кәсіподақтар федерациясының еңбекақы мәселесін шешуде атқарып жатқан шаралары туралы айтып берді.
«Кәсіподақтар федерациясы Үкіметке Еңбек кодексінде жалақыны инфляция деңгейіне дейін міндетті жыл сайынғы индексациялау туралы норманы бекіту туралы ұсыныс енгізді. Сондай-ақ, Үкіметке ең төменгі жалақыны есептеу және кезең-кезеңімен арттыру әдістемесін бекітуді ұсынып отырмыз. Бұл мәселелер біздің күнделікті күн тәртібімізде екеніне сендіремін. Ал кәсіподақтар өз шешімін кәсіпорын жұмыскерлерінің пайдасына шешуді көздеп отыр», – деді Сатыбалды Дәулеталин.
Өз кезегінде ҚРКФ төрағасының бірінші орынбасары Мұхтар Тінікеев зейнет жасын қысқарту туралы сұраққа жауап бере отырып, кәсіподақтардың бұл мәселені соңғы он жылдан бері көтеріп келе жатқанын атап өтті.
«Иә, 50-55 жаста зейнеткерлікке шығу мәселесін шешуге болатын шығар, бірақ шағын зейнетақы жинақтарымен қанша өмір сүруге болады. Бұл жерде біз үшін мәселелерді жүйелі түрде шешу маңызды: еңбекақы жүйесін дұрыс қалыптастырып, қарттықта лайықты өмір сүруге мүмкіндік беретін жалақыны көтеру керек», – деді Мұхтар Тінікеев.
«Қазметаллкәсіп» салалық кәсіподақтың төрағасы Асылбек Нұралин еңбекақы мен зейнет жасы мәселелері Кәсіподақтар федерациясының Стратегиясында және өткен жылы әлеуметтік әріптестер қол қойған салалық келісімде белгіленгенін айтты.
Осы ретте зауыт директоры Евгений Ивченко ұжымға кәсіпорын жұмыскерлерінің жалақысын келесі жылдың басында көтеру жоспарланғанын хабарлады. Оның айтуынша, қазіргі уақытта жалақы облыстағы орташа жалақыға сәйкес келеді.
Зауыт жұмыскерлерімен әңгімелескеннен кейін ҚРКФ төрағасы дәнекерлеу және құрастыру цехының жұмысымен танысты, мұнда оған «Қолжетімді ЖҚҚ» жобасы ұсынылды.
«Қолжетімді ЖҚҚ» жобасы кәсіподақтың бастамасы болды, оның мәні жұмыскерлердің белгілі бір стандарттар бойынша жеке қорғаныс құралдарын алу міндеттемесін жою болып табылады. Әрбір қызметкер өз өтініші бойынша және қажет болған жағдайда ЖҚҚ шектеусіз алады. Бұл құлаққаптар, қолғаптар, маскалар», – дейді бастауыш кәсіподақ ұйымының төрағасы Ольга Корягина.
«ERG Service» ЖШС құрамына кіретін Павлодар машина жасау зауытында бүгінде 600 адам еңбек етеді. Зауыт директоры Евгений Ивченконың айтуынша, оның басты міндеті – өндіріс мәдениетін әлемдік деңгейге жеткізу. Евгений Ивченконың өзі Павлодар машина жасау зауытына 21 жыл бұрын келіп, еңбек жолын металл конструкциялар цехында слесарь болып бастаған.
Қазіргі басшы бір кездері кәсіподақтың қатардағы мүшесі болған, еңбек тәжірибесін туған зауытында әлеуметтік-еңбек қатынастарын тиімді дамытуға жұмсамақ.
«Toyota мамандары қараша айында бізге келіп аудит жүргізеді. Біз үшін әлемдік стандарттарға сай бизнес бағытын құру үшін қай жерде екенімізді түсіну маңызды. Бұл өндіріс мәдениетіне, ұтымды өндіріске, еңбек ұжымының әлеуметтік-экономикалық дамуына барынша қолайлы жағдай жасауға да қатысты. Санаулы жылдан кейін кәсіпорнымызбен мақтануды қалаймын», – деп зауыт директоры өз мақсатымен бөлісті.
ҚРКФ төрағасы Сатыбалды Дәулеталин директор Ивченконың ниетін қолдап, өндірісті уақтылы жаңғыртудың және жұмысқа және қызметкерлерге әлеуметтік жауапкершілікпен қараудың маңыздылығын атап өтті.
«Мен кәсіпорында қолданыстағы ұжымдық шартпен таныстым. Ұжымдық шартты жасау кезінде сіздің компанияңыз негізгі мақсатты ұстанғанын атап өткім келеді – қызметкерлердің нақты мүдделері мен қажеттіліктері туралы ең дәл идея ескерілген», – деп түйіндеді сөзін ҚРКФ төрағасы.
Еске салайық, бұл күндері Қазақстан Республикасы Кәсіподақтар федерациясының делегациясы Павлодар облысында жұмыс сапарымен жүр. Сапар бағдарламасына еңбек ұжымдарымен және әлеуметтік әріптестермен кездесулер кіреді.
Қазақстан Республикасы Кәсіподақтар федерациясының медиа орталығы